Futbol bo‘yicha APLning 23-turidan o‘rin olgan markaziy bahs 25-yanvar, shanba kuni Londonda bo‘lib o‘tadi. Unda “Chelsi” o‘z uyida “Manchester Siti”ni qabul qiladi.
Ko‘plab nashrlar ushbu bahsda asosiy tarkibda maydonga tushishi mumkin bo‘lgan futbolchilar ro‘yxatini e’lon qilmoqda. Masalan, “Sportingnews” nashri Gvardiola shogirdlari quyidagi tarkibda maydonga tushishini tahmin qilmoqda:
“Manchester Siti”ning taxminiy tarkibi (3-2-2-3, o‘ngdan chapga): Ederson (darvozabon) — Husanov, Akanji, Gvardiol — Lyuis, Gundo‘g‘an — De Bryuyne, Grilish — Foden, Holand, Marmush.
Nashrning ma’lum qilishicha, Natan Ake Parijga safar qilmagan, Ruben Diash esa tanaffus vaqtida murabbiyga o‘yinni davom ettira olmasligini aytgan. Portugaliyalik markaziy himoyachining o‘rniga Jon Stouns emas, balki Riko Lyuisning tushirilgani futbolchining asosiy tarkibda o‘ynashga hali tayyor emasligini ko‘rsatmoqda.
Bu holat yangi o‘yinchilar Abduqodir Husanov va Vitor Reysga imkoniyat eshigini ochadi. Ayniqsa, Husanovning Liga 1 dagi tajribasi uni asosiy tarkibga qo‘shilish uchun eng real nomzodga aylantiradi.
Maydonning boshqa tomonida Jeremi Doku va Savinyoning joriy haftadagi jismoniy muammolari tufayli Omar Marmush darhol tarkibga qo‘shilishi mumkin.
Gvardiola “PSJ”ga qarshi bahsda Bernardu Silva va Mateo Kovachichning o‘yinidan noroziligini bildirgan. Gundo‘g‘an va Jek Grilish ularning o‘rnini egallashi mumkin, ammo hozircha ideal yechim mavjud emas.
“Sportsmole” nashri “Manchester Siti” jamoasi shu hafta tarkibini uchta yangi futbolchi bilan kuchaytirgani, ushbu uchlikning barchasi shanba kuni debyut qilish uchun da’vogar ekani haqida yozdi. Ammo taxminiy tarkibga yangi futbolchilarning birortasini kiritmadi:
“Manchester Siti”ning taxminiy boshlang‘ich tarkibi: darvozabon—Ortega, himoyachilar—Lyuis, Stouns, Akanji, Gvardiol, yarim himoyachilar—Kovachich, Bernardu, hujumkor yarim himoyachilar—Foden, De Bryuyne, Savinyo, hujumchi—Holand.
“Standart” nashri Ruben Diash “PSJ”ga qarshi uchrashuvda jarohat olgani bois Abduqodir Husanov yoki Vitor Reys maydonda debyut qilish imkoniga ega bo‘lishi mumkin ekani haqida taxmin qilmoqda. Omar Marmush ham o‘zining birinchi o‘yinini o‘tkazishi mumkin. Bundan tashqari Jon Stouns ham tayyor.
“Theanalyst” nashri Gvardiola yanvar oyida Abduqodir Husanov va Vitor Reysni qo‘shib, o‘zining himoya chizig‘ini kuchaytirgani va ular shanba kuni o‘yinda maydonga tushish uchun nomzod ekani haqida yozdi. Nashr Ruben Diashning o‘yinga tushmaslik ehtimoli yuqori ekanini qayd etgan.
Yevropa Chempionlar Ligasining umumiy guruh bosqichida “PSJ”ga qarshi uchrashuvda maydonga tushgan Gvardiola shogirdlari 4:2 hisobida mag‘lubiyatga uchradi. “Shaharliklar” 2 ta to‘p ustunligini ushlab qola olmadi. So‘nggi turdagi g‘alabadan boshqa har qanday natija “Manchester Siti”ni musobaqa bilan xayrlashishiga sababchi bo‘ladi.
Ma’lumot uchun, 22 turdan so‘ng “Chelsi” 40 ochko bilan APL turnir jadvalida 4-o‘rinni egallab turibdi. “Shaharliklar” 38 ochko bilan 5-o‘rinda joylashgan. Jamoalar o‘rtasidagi bahs ertaga, 25-yanvar kuni bo‘lib o‘tadi.
Izoh (0)