Taniqli insayder Fabritsio Romano “Lans” va O‘zbekiston MTJ himoyachisi Abduqodir Husanovning transferi bo‘yicha maʼlumot berdi.
Uning yozishicha, “Manchester Siti” Abduqodir Husanov borasidagi bitimda faol muloqot olib bormoqda.
“ ‘Lansʼ bilan muzokaralar o‘yinchi tomonidan ham, klub tomonidan ham boshlangan. Hali oldinda ko‘plab qadamlar bor, sababi unga ko‘plab klublar qiziqmoqda”, deb yozdi Romano.
Avvalroq Abduqodir Husanov “Manchester Siti”ning yanvar oyidagi trasferlar oynasidagi eng asosiy maqsadlari qatoriga qo‘shilgani haqida xabar berilgandi.
20 yoshli futbolchi ushbu mavsumni muvaffaqiyatli o‘tkazmoqda va hozirda bir necha APL klublari, jumladan “Lester”, “Nyukasl”, “Chelsi”, “Vest Hem” nazariga tushgan. O‘zbekistonlik futbolchi o‘z pozitsiyasida eng iqtidorli futbolchilardan biri sifatida qaralmoqda.
O‘z navbatida “Lans” klubi futbolchini 30 million yevrolik taklif tushgan taqdirdagina sotishga tayyorligini ma’lum qilgan.
Muxlislar e’tirofiga ko‘ra, futbolchi Liga 1 ning birinchi davrasi ramziy jamoasiga kiritildi. Transfermarkt portali futbolchining transfer bahosini 12 million yevroga baholagan.
Abduqodir Husanov Fransiya chempionatida oktyabr oyining “Eng yaxshi yosh futbolchisi” deb topilgandi.
Husanov yosh bo‘lishiga qaramay, O‘zbekiston terma jamoasining ham asosiy tarkibidan muqim joy egalladi. U hozirgacha 18 uchrashuvda milliy jamoa sharafini himoya qildi.
Izoh (0)