“APLning yarmi talabgor edi. Transferni shaxsan Gvardiola xohladi. U ijaraga berilmaydi” — Abduqodir Husanovning agenti

Abduqodir Husanovning manfaatlarini ifoda etuvchi futbol agenti G‘ayrat Xasbiullin “Sport-Ekspress” uchun intervyu berdi. Mutaxassis intervyusida o‘z mijozi “Manchester Siti”ga o‘tishi qanday ro‘y bergani, boshqa takliflar va futbolchining imkoniyatlari haqida gapirdi.

— Abduqodirning “Siti”ga transferi reallashgani siz o‘zingiz qachon tushunib yetdingiz? Muzokaralar qanday kechdi?

— Biz noyabr oyi oxirida “Siti”ning futbolchimizga qiziqishi jiddiy ekanini bildik. Dekabr oyi boshida esa ingliz klubi ehtimoliy transfer bo‘yicha “Lans” bilan ham, biz bilan ham muloqot boshladi.

— Boshqa variantlar ham bor edimi?

— O‘sha vaqtda APLdagi jamoalarning yarmi Husanov bo‘yicha biz bilan aloqaga chiqdi. Qaysidir pallada men biz bilan aloqaga chiqqan 12 ta ingliz klubini sanagandim.

— “Siti”ning raqobatchisi qaysi edi?

— “Nyukasl”. Bu klub oxirigacha poygada qoldi. Bu juda yaxshi klub, qiziqarli loyiha. Ularning kelajagi katta. O‘ylaymanki, “Nyukasl” yaqin yillarda muntazam ravishda APLning kuchli oltiligida bo‘ladi. Ammo moliyaviy feyr-pley va boshqa omillar tufayli “Nyukasl” muayyan taklif bera olmadi. Ish cho‘zildi. Bu vaqtda esa “Siti” “Lans”ga ham, bizga ham bosim o‘tkazib, javobimizni so‘radi. Yakunda biz shu variantni tanladik. Kelishuvga erishildi.

— Husanov Xosep Gvardiolaning eʼtiborini birinchi navbatda nimasi bilan tortdi?

— Menimcha, bu savolni menga emas, Pepning o‘ziga berish to‘g‘riroq bo‘lsa kerak. U men bilan bunday fikrlarini bo‘lishmaydi (kuladi). Ammo tushunishimcha, Abduqodir — yosh, jismonan baquvvat, yakkakurashlardan qochmaydigan futbolchi sifatida “Siti”ni o‘ziga qaratgan. U hech kimdan tap tortmaydi. Pepga shunday himoyachi kerak bo‘lgan. Husanov barcha ko‘rsatkichlarga ko‘ra Yevropada 23 yoshgacha bo‘lgan himoyachilarning kuchli beshligiga kiradi. Men bundan ham ko‘prog‘ini aytaman. Biz bilan aloqaga chiqqan klublarning barchasida Abduqodir ro‘yxatning eng yuqorisida turgan. Ikkinchi, uchinchi emas, balki aynan birinchi!

— “Siti”da hammi?

— Ha, “Siti”da ham u short-list tepasida edi. “Nyukasl”dagilar esa shunday degandi: “Bizga faqat u kerak — boshqa hech kim”!

— SSKAdagi Abbos Fayzullayev yaqinda Husanov soatiga 35 kilometr tezlikda yugura olishini aytgandi. U raketami?

— Hatto 35 emas, soatiga 37 kilometr tezlik. Hozir qaysi o‘yinda bo‘lganini eslay olmayman, u Fransiya chempionatida yaponiyalik bir hujumchidan aynan shunday tezlikda yugurib o‘zib ketgandi. Yakkakurashlarda ham u kuchli, hech kimdan qolishmaydi. Uning birinchi liga (Fransiya oliy divizioni) birinchi davrasidagi statistikasini qarashingiz mumkin. Barchasi yaqqol tushunarli bo‘ladi.

— Husanovning karyerasi haddan tashqari tez ko‘tarilmadimi? Axir 2023-yilda ham u Belarus chempionatidagi “Energetik-BGU” safida to‘p surardi.

— Demak, uning atrofidagi odamlar va uning o‘zi karyerani rivojlantirish bo‘yicha barchasini to‘g‘ri bajargan. Demak, biz xato qilmaganmiz.

— Jiddiy raqobat tufayli “Siti” Abduqodirni ijaraga berib yuborishi mumkinligini ham o‘ylaysizmi?

— Ha, raqobatni hech kim inkor etmaydi. Ammo mening tushunishimcha, Pep jamoani qaytadan qurishga qaror qilgan. Va hozirda “Siti” eng yaxshi yosh markaziy himoyachilarni xarid qilmoqda. Abduqodir hech qachon asosiy tarkib uchun kurashdan cho‘chimagan, u doimo qiyin, og‘riqli kurashga kirishgan. Va men “Siti” uni keyin ijaraga berib yuborish uchun 50 millionga oldi deb o‘ylamayman. Gvardiola uni hozirning o‘zida tarkibda ko‘rishni istadi. Aks holda “Siti” uni sotib olib, klubida ijarada qoldirishi mumkin edi. Inglizlar uni qishdayoq olib ketdimi, demak, Gvardiola chindan ham unga umid qilmoqda.

— Shunchaki, masalan, taniqli agent Dmitriy Selyuk transfer summasi 40-50 million emas, maksimum — 20 million bo‘lgan deb hisoblamoqda.

— 40 million. Plyus 10 million bonuslar. O‘ylaymanki, bu shundoq ham barchaga maʼlum, buni hammayoqda eʼlon qilishdi. Jami 50 bo‘ladi.

— Husanovni “Energetik- BGU”da shug‘ullantirgan Pavel Rodnenok o‘zbek futbolchisi “Siti”dagi barcha raqobatchilarini yamlamay yutishini aytdi. U ruhiy jihatdan naqadar kuchli?

— “Lans” murabbiyi Frenk Es 19 yoshli futbolchimizni ko‘rganida, u kattalardek o‘ynashini aytgandi. Husanov uchun chindan ham hech qanday chegaralar yo‘q, u yulduzlarga qarshi o‘ynashga tayyor. Bu futbolchi aynan himoyada o‘ynab rohatlanadi. “Lans”ning o‘yinlarini kuzatganmisiz, yo‘qmi, bilmayman, ammo muxlislar uning yakkakurashlaridan zavq olishardi. Odatda barcha goldan hayratga tushadi, u yerda esa tribunalar uning himoyadagi kurash olib borishini olqishlashardi! Uning himoyadagi har bir muvaffaqiyatli harakati gulduros qarsaklarga ulanardi.

— Rodnenok “Energetik-BGU”da Husanov kuniga to‘rt martadan mashg‘ulot o‘tkazganini aytdi.

— Anatoliy Ivanovich Yurevich Abduqodir uchun maxsus dastur ishlab chiqqandi. Darvoqe, bir necha futbolchilarimiz ushbu murabbiy qo‘lidan o‘tgan. Biz uning yuklamalari qanchalik og‘irligini bilamiz. Ammo, dosh berganlar yuqori darajada o‘ynab ketgan. Abduqodir Yurevichning qo‘liga 16 yoshida borgan va bu uni pirovardida hozirgidek juda baquvvat qilgan omillardan biri bo‘lgan. Uning otasi — O‘zbekiston milliy jamoasida o‘ynagan sobiq futbolchi. U o‘g‘liga futbol haqidagi tushunchalarni singdirgan. Otasi uning bosh tanqidchisi va maslahatgo‘yi.

— Shu bilan birga, ayrim ekspertlar “Siti”da Abduqodirda hujumni boshlashdagi birinchi pas bilan muammolar bo‘lishini taxmin qilmoqda.

— Lekin biz agar dunyodagi eng yaxshisi bo‘lmasa, eng yaxshilardan biri bo‘lgan murabbiyga bordik! Gvardiola Abduqodirga ko‘p narsani o‘rgatishi, uning kamchiliklarini tuzatishi va uni yanada kuchliroq qilishi mumkin. Yaʼni biz oddiy variantga emas, uning o‘ynashi kafolatlangan o‘rtamiyona klubga emas, balki jiddiy maqsadlar qo‘yiladigan va u albatta o‘sishda, rivojlanishda davom etadigan joyga bordik. Shuning uchun yakunda “Manchester Siti”ni tanladik. Umid qilamizki, Pep Abduqodirni bir necha yil ichida Yevropaning eng yaxshi himoyachisiga aylantiradi.

— Gvardiola birinchi muloqotida Husanovga nimalar dedi?

— Men o‘sha yerda edim. Pep Abduqodirga shunday dedi: “Men sen imkon qadar tezroq ingliz tilini o‘rganishingni istayman, biz ko‘proq gaplasha olishimiz uchun”.

— Uning inglizchasi uncha yaxshi emasmi?

— Abduqodir Fransiyada o‘ynayotgandi. Hozir u faollik bilan inglizchani o‘rganmoqda. Pep unga yana shunday dedi: “Har kuni kamida bir soat shug‘ullan, iltimos”! Husanov, umuman olganda mashg‘ulot jarayonidagi barcha gapni tushunadi, ammo Gvardiola uchun nyuanslar, detallar juda muhim. Shuning uchun ular yaqinroq muloqot qilishlari kerak. Shunday ekan, Abduqodir o‘z inglizchasini yaxshilashi kerak.

— Abduqodir Belarusda o‘ynaganida, sizlarda Rossiyaning top klublaridan takliflar bo‘lganmi?

— Mening sherigim Ulug‘bek Asanbayev bor. Biz bu futbolchini birgalikda olib yuribmiz. Unga RPLdan chiqqan bo‘lishlari mumkin. Men esa eʼtiborimni faqat Yevropa yo‘nalishiga qaratgandim. Shuning uchun bu savolga javob berishim qiyin. Qolaversa, men amalga oshmagan ishni muhokama qilishni yoqtirmayman. Faqat Turkiyadan ham qiziqish bo‘lganini aytishim mumkin. Ammo biz yakunda “Manchester Siti”ga keldik, bu esa amalda bosqichma-bosqich to‘g‘ri harakatlanganimizni anglatadi.

— Hozirda “SSKA” sport direktorligidan ketgan Andrey Movsesyan “armiyachilar” o‘z vaqtida Husanov bilan shartnoma tuzishi mumkin bo‘lgani, ammo uni “Lans” olib ketganini aytdi.

— Bizda prioritetda doimo Yevropa chempionati bo‘lgan. U Belarusda o‘ynayotganida, biz sherigim bilan bu mavzuni ko‘p gaplashardik. U mendan Yevropa yo‘nalishida ishlashimni so‘ragan. Biz aynan shu maqsadni ko‘zlagandik va unga qarab bordik.

— Nega o‘zbekistonlik himoyachi “Manchester Siti” darajasigacha o‘sa oldi, rossiyaliklar esa — yo‘q?

— Rossiyalik futbolchilarni muhokama qilish huquqim yo‘q, bor eʼtiborim o‘zimizning yigitlarga qaratilgan.

— Husanov — fenomenmi?

— Bu to‘g‘ri tarbiyalangan, futbol taʼlimini ko‘rgan, to‘g‘ri muhitda bo‘lgan juda isteʼdodli futbolchi. Men shunday tushuntirgan bo‘lardim.

Ma’lumot uchun, “Manchester Siti” klubi o‘zbekistonlik himoyachi Abduqodir Husanov bilan 4,5 yilga mo‘ljallangan shartnoma imzoladi. Abduqodir o‘ziga 45-raqamni tanlagan.

Shu tariqa Abduqodir Husanov Angliya Premyer Ligasida o‘ynaydigan birinchi o‘zbek futbolchisiga aylanadi. Angliyaning yuqori divizionida futbolchilari o‘ynagan davlatlar soni esa 119 taga yetadi.

Ma’lumot uchun, “Lans” Husanovni 2023-yil iyul oyida “Energetik-BGU”dan 100 ming yevroga sotib olgandi. Husanov Fransiya klubi safida 31 ta o‘yinda maydonga tushib, bir marta golli uzatma amalga oshirdi.