Илон Маск Европа давлатларининг амалдаги ҳокимиятларини танқид қилиш орқали Европа иттифоқининг рақамли қонунчилигини бузмаяпти. Бу ҳақда Европа комиссияси вакили Томас Рене Брюсселдаги матбуот анжуманида айтиб ўтди.
“Фикр эркинлиги бизнинг рақамли актимизнинг асосини ташкил этади. Ҳар ким ўз фикрини билдириш ҳуқуқига эга. Бу Илон Маскка ҳам тегишли”, деди у журналистлар саволларига жавоб берар экан.
Томас Рененинг эслатишича, Еврокомиссия Маск ўзининг Х ижтимоий тармоғидаги ёзувларини махсус йўллар билан фойдаланувчиларга тарғиб қилган ёки йўқлигини текширмоқда, бу рақамли ҳамжамият стандартларини бузиши мумкин.
Аввалроқ Илон Маск Британия бош вазири Кей Стармер истеъфога чиқиши ва судга тортилиши кераклигини айтган эди. Tesla ва Space Х асосчисининг сўзларига кўра, Стармер ўнлаб йиллар давомида Англия шимолида вояга этмаган қизларга нисбатан содир этилган жинсий жиноятларда шерик ҳисобланади.
Welt аm Sonntag газетасида чоп этилган мақоласида Маск Германиянинг келажаги иқтисодий ва маданий таназзул ёқасида қолаётгани, “Германия учун муқобил” (АfD) партияси эса “умиднинг сўнгги учқуни” эканлиги ҳақида фикр билдирди.
Бундан олдин тадбиркор Х ижтимоий тармоғидаги саҳифасида “Фақат АfD Германияни қутқара олади” деб ёзган эди. Германияда бундай қўллаб-қувватлаш бошқа партияларнинг ғазаби ва танқидига сабаб бўлди ва ҳукумат вакили Кристиан Хофман Маскнинг АfD’га овоз беришга чақиришларини сайлов курашига аралашишга уриниш деб атади.
Изоҳ (0)