Las-Vegasdagi Tramp mehmonxonasi yonida 1-yanvar kuni Cybertruck portlatildi. Buni amalga oshirgan shaxs amaldagi amerikalik harbiy xizmatchi bo‘lib, armiya maxsus kuchlarda xizmat qilgan. Bu haqda politsiya va harbiylarga tayanib, BBC xabar berdi.
37 yoshli Mettyu Livelsberger maxsus razvedka kuchlarining serjanti bo‘lgan. Tergovchilar u va Yangi yil kechasida Yangi Orleanda 15 kishini mashinada bosib ketgan harbiy Shamsuddin Jabborning tarjimayi holidan bir nechta o‘xshashliklarni topdi. Ammo Livelsberger va Jabbor tanish bo‘lgani haqida ma’lumot yo‘q.
Las-Vegas sherifi Kevin Makmaxill yonib ketgan pikapdan Livelsbergerning harbiy guvohnomasi va pasporti, shuningdek, uning nomiga yozilgan bir nechta kredit kartalari, ikkita to‘pponcha, ayfon hamda soat topilganini aytdi.
Sherifning aytishicha, Livelsbergerning tanasi tanib bo‘lmaydigan darajada kuyib ketgani sababli, to‘liq rasmiy identifikatsiya uchun DNK tahlili o‘tkazish zarur. Biroq, jasadda serjant Livelsbergernikiga o‘xshash ikkita tatuirovka aniq ko‘rinib turibdi.
Mahalliy koroner (o‘lim sabablarini aniqlovchi sudya) Livelsberger o‘zini otib o‘ldirganini ma’lum qildi. Tergov xulosasiga ko‘ra, u portlashdan bir necha soniya oldin o‘z joniga qasd qilgan.
Men bu holatni ishonch bilan o‘z joniga qasd qilish deb aytishim mumkin, shundan so‘ng darhol bomba portlashi sodir bo‘lgan, dedi sherif Makmaxill.
Pentagon vakili Livelsbergerning maxsus kuchlar jangchisi ekanini tasdiqladi va uning ta’tilda bo‘lganini ma’lum qildi. Federal qidiruv byurosi gumonlanuvchining mashinani portlatishi sababi hozircha noma’lum ekanini aytdi. U Cybertruck avtomobilini Las-Vegasdan ming kilometr uzoqlikda joylashgan Kolorado shtatining Denver shahrida ijaraga olgan.
Yonilg‘i va mushaklar solingan pikapning portlashi oqibatida qurbonlar qayd etilmagan, yetti kishi yengil tan jarohati olgan. Tergovchilarning fikriga ko‘ra, bu qisman Cybertruck kuzovi portlash to‘lqini va olovni yuqoriga yo‘naltirganiga bog‘liq.
Nyu Orleandagi ommaviy qotillik va Las-Vegasdagi portlashdan so‘ng politsiya hamda Federal qidiruv byurosi Jabbar va Livelsberger o‘rtasidagi faqat bitta umumiy jihatni ta’kidladi: ikkovi ham Turo kompaniyasining veb-sayti orqali pikap ijaraga olgan. Endi tergovchilar yana bir nechta o‘xshashliklarni topdi.
Ikkalasi ham Shimoliy Karolinadagi Fort Bragg (hozirgi Fort Liberty) bazasida xizmat qilgan. Fort Liberty — ulkan harbiy baza, u yerda 50 mingdan ortiq kishi xizmat qiladi. Bundan tashqari, Jabbor va Livelsberger 2009-yilda Afg‘onistonda bo‘lgan. Lekin, baribir, ular u yerda uchrashgani haqida ma’lumot yo‘q.
Hozircha FQB Yangi Orlean va Las-Vegasdagi voqealar o‘zaro bog‘liq emas hamda Jabbor yakka o‘zi harakat qilgan, deb taxmin qilmoqda.
Izoh (0)