“Manchester Siti” bosh murabbiyi Xosep Gvardiola jamoaning joriy mavsumdagi muvaffaqiyatsizliklari sabablarini izohladi.
“Men o‘zimga nisbatan juda adolatliman va asosiy sabab o‘zim ekanligini tan olaman. Gap futbolchilarda emas. Ularda biroz pasayish kuzatilyapti, lekin bu tabiiy jarayon, o‘tgan mavsumda ham shunday bo‘lgan.
Men yechim topishim kerak edi, boshqacha yo‘l tutishim kerak edi, lekin buni qilmadim. Shu sababli biz hozirgi vaziyatda qoldik — aybdor o‘zimman. Buni boshqalarga yaxshi ko‘rinish uchun emas, haqiqat bo‘lgani uchun gapirayapman. Men futbolchilarni boshqaraman va ular bilan kerakli natijaga erisha olmadim”, deya Gvardiolaning so‘zlarini keltiradi The Guardian nashri.
Hozirda “Manchester Siti” Angliya chempionati turnir jadvalida oltinchi o‘rinda bormoqda. Xosep Gvardiola jamoasi 19 turdan so‘ng 31 ochkoga ega.
Bugun, 4-yanvar kuni jamoa “Vest Hem”ga qarshi maydonga tushadi.
Avvalroq “Manchester Siti” O‘zbekiston terma jamoasi himoyachisi Abduqodir Husanovni yanvardayoq o‘z tarkibiga qo‘shib olishi mumkinligi haqida xabar berilgandi.
Izoh (0)