“Манчестер Сити” бош мураббийи Хосеп Гвардиола жамоанинг жорий мавсумдаги муваффақиятсизликлари сабабларини изоҳлади.
“Мен ўзимга нисбатан жуда адолатлиман ва асосий сабаб ўзим эканлигини тан оламан. Гап футболчиларда эмас. Уларда бир оз пасайиш кузатиляпти, лекин бу табиий жараён, ўтган мавсумда ҳам шундай бўлган.
Мен ечим топишим керак эди, бошқача йўл тутишим керак эди, лекин буни қилмадим. Шу сабабли биз ҳозирги вазиятда қолдик — айбдор ўзимман. Буни бошқаларга яхши кўриниш учун эмас, ҳақиқат бўлгани учун гапираяпман. Мен футболчиларни бошқараман ва улар билан керакли натижага эриша олмадим”, дея Гвардиоланинг сўзларини келтиради The Guardian нашри.
Ҳозирда “Манчестер Сити” Англия чемпионати турнир жадвалида олтинчи ўринда бормоқда. Хосеп Гвардиола жамоаси 19 турдан сўнг 31 очкога эга.
Бугун, 4 январь куни жамоа “Вест Ҳэм”га қарши майдонга тушади.
Аввалроқ “Манчестер Сити” Ўзбекистон терма жамоаси ҳимоячиси Абдуқодир Ҳусановни январдаёқ ўз таркибига қўшиб олиши мумкинлиги ҳақида хабар берилганди.
Изоҳ (0)