Zimbabve poytaxti chekkasida 60 kishida vabo kasalligi qayd etildi. Kasallik tufayli bir kishi halok bo‘lgani ma’lum qilindi.
Bu haqda Sog‘liqni saqlash va bolalar salomatligi vazirligi ma’lumotlariga tayanib, The Herald gazetasi xabar berdi.
Departament maʼlumotlariga ko‘ra, kasallik epidemiyasi Xarare shimolidagi Mazue qishlog‘ida qayd etilgan. Bunga yagona artezian qudug‘i suvining tozalanmagani va oqava suvning ochiq quduqlarga tarqalgani sabab bo‘lgan.
Qayd etilishicha, mutasaddi idoralar tomonidan mahalliy aholi o‘rtasida profilaktika ishlari olib borilmoqda, kasallanganlarga yordam ko‘rsatish va shaxsiy gigiyena qoidalarini targ‘ib qilish maqsadida vaqtinchalik markaz tashkil etilgan. Aholini toza ichimlik suvi bilan ta’minlash masalasi hal etilmoqda.
2023-yilda vabo epidemiyasi Janubiy Afrika taraqqiyot hamjamiyatining (SADC) bir qancha mamlakatlarida, birinchi navbatda Zambiya, Zimbabve, Malavi, Mozambik va Tanzaniyada qayd etilgan. O‘tgan fevral oyida SADC davlat va hukumat rahbarlarining favqulodda sammiti mintaqada vaboga qarshi ommaviy emlashni o‘tkazish va chegaralarda sanitariya nazoratini kuchaytirishga qaror qildi.
Izoh (0)