Afrikaning Zambiya davlatida vabo epidemiyasi paydo bo‘ldi. Kasallik tez tarqalmoqda, 400 dan ortiq odam allaqachon vafot etgan, deb yozadi ABC News.
Telekanal xabar berishicha, Zambiyada vabo epidemiyasi oqibatida 10 mingdan ortiq odam kasallangan, 412 kishi vafot etgan. Mamlakat hukumati barcha maktablarni 29-yanvargacha karantinga yopdi, poytaxt Lusakadagi 60 ming tomoshabinga mo‘ljallangan futbol stadioni esa ulkan dala kasalxonasiga aylantirildi.
Zambiya hukumati keng ko‘lamli emlash kampaniyasini o‘tkazishi va epidemiyaga qarshi kurashish uchun jabrlangan hududlarga kuniga 2,4 million litr toza suv jo‘natishini ma’lum qildi. Favqulodda vaziyatlarni boshqarish milliy agentligi yuqori shay holatga keltirildi.
Zambiyada vabo 2023-yil oktyabr oyida aniqlangandi, ammo uni tezda bartaraf etishning iloji bo‘lmadi. Kasallikning avj olishi epidemiyaga aylandi — 17 yanvar holatiga ko‘ra, Zambiya sog‘liqni saqlash instituti 10 413 ta kasallanish holatni qayd etdi. Mamlakat Sog‘liqni saqlash vazirligi tumanlarning deyarli yarmida va 10 ta viloyatdan to‘qqiztasida vabo aniqlanganini ma’lum qildi va epidemiyani “milliy muammo” deb atadi.
Kasallikni yuqtirganlar soni o‘sishda davom etmoqda, shifokorlar har kuni 400 dan ortiq yangi holatlarni aniqlamoqda. Jahon sog‘liqni saqlash tashkiloti Zambiyaga vaboga qarshi 1,4 million dozaga yaqin vaksina yubordi.
Zambiyada vabodan o‘lim darajasi o‘rtacha statistik ko‘rsatkichdan sezilarli darajada yuqori — 4 foiz. Vaziyat kuchli yomg‘ir va suv toshqini oqibatlari bilan murakkablashdi, mamlakatning ayrim hududlari amalda botqoqlarga aylangan.
Bungacha Afrikaning boshqa mamlakatlarida — Malavi, Mozambik, Nigeriya, Uganda va Zimbabveda mahalliy vabo epidemiyasi kuzatilgan. 2023-yil boshidan buyon Afrika janubida 200 mingdan ortiq odam vabo bilan kasallangan, 3 mingdan ortiq kishi vafot etgan.
Izoh (0)