Yevropa Ittifoqida xavfli narkotik — fentanilning tobora ommalashib borayotgani mintaqada yangi “qora vabo”ni keltirib chiqarishi mumkin. Bu haqda Yevroparlamentning (YP) italiyalik deputati Paolo Inselvini ma’lum qildi.
“Afsuski, Yevropa Ittifoqida giyohvand moddalar va opioidlarni iste’mol qilish doimiy ravishda o‘sib bormoqda. 2021-yilda 87,4 million nafar Yevropa fuqarosi giyohvand moddalar qabul qilgan, ulardan bir millioni opioidlarni tibbiy ko‘rsatmasiz iste’mol qilgan.
Bu tashvishli tendensiya. Hozirda Amerika Qo‘shma Shtatlarida nazoratsiz holda tarqalayotgan bu giyohvand modda Yevropada millionlab odamlarning hayotini yo‘q qilishga olib kelishi mumkin”, dedi Paolo Inselvni.
Avvalroq AQSHning sobiq prezidenti Donald Tramp Qo‘shma Shtatlarda giyohvand moddalar savdosi bilan shug‘ullanuvchilar uchun o‘lim jazosini joriy etishni taklif qilgan edi. 2023-yilda Federal Kasalliklarni nazorat qilish va oldini olish markazlari mamlakatda Meksikadan olib kelingan fentanilni iste’mol qilish tufayli yuzaga kelgan o‘limlar soni deyarli to‘rt baravarga oshganini xabar qilgandi.
Izoh (0)