Angliyaning ikkinchi divizioni “Plimut Argil” klubi Ueyn Runini iste’foga chiqardi. Angliya terma jamoasining sobiq futbolchisi boshqarib kelgan klub ketma-ket to‘qqizta o‘yinda g‘alaba qozona olmagan.
39 yoshli mutaxassis 2024-yilning may oyidan beri Angliyaning ikkinchi kuchli divizionidan klubni boshqarib kelayotgandi. Runi qo‘l ostida “Plimut” 25 uchrashuv o‘tkazib, 5 g‘alaba, 6 durang va 14 mag‘lubiyat alamini totib ko‘rgan. Jamoa 25 o‘yindan so‘ng 21 ochko bilan so‘nggi, 24-o‘rinda bormoqda.
“Plimut”dan oldin “Birmingem” jamoasini boshqargan va 2024-yilning yanvarida u yerdan iste’foga chiqarilgandi. Ungacha esa MYu afsonasi Shimoliy Amerikaning MLS ligasida o‘ynaydigan “Di Si Yunayted” jamoasida ishlagan va 2023-yil oktyabr oyida ishdan bo‘shatilgandi. Runi, shuningdek, Angliyaning Derbi Kaunti klubida ham murabbiylik qilgan.
Faoliyatini 2021-yilning yanvarida yakunlagan Ueyn Runi futbolchi sifatida “Everton”, “Manchester Yunayted” va “Di Si Yunayted” klublarida o‘ynagan. Angliya terma jamoasida u tarixdagi ikkinchi to‘purar (53 gol), o‘tkazilgan o‘yinlar soni (120) bo‘yicha esa Piter Shiltondan (125) keyin ikkinchi natija sohibi hisoblanadi.
Izoh (0)