Odatda ko‘pchilik futbol ishqibozlari ma’lum bir o‘yinchining katta pul evaziga o‘zini katta qilgan yoki ajoyib o‘yin ko‘rsatib turgan klubdan ketganini juda og‘ir qabul qiladi. Ammo buni to‘g‘ri tushunish va vaziyatga real qarash lozim. Futbolchilarning “maydondagi umri” juda qisqa va charm to‘p ustalarining yaxshiroq sharoitga intilishi tabiiy. Chunki ular butun umr yugurib yura olmasligini va bir kun kelib, butsilarini “mixga ilishini” yaxshi biladi. Misol tariqasida, ortda qolgan 2021-yilda ham juda ko‘plab futbolchilar katta sport bilan xayrlashdi. “Daryo” ushbu sahifada ulardan eng mashhurlarini yodga oladi.
Ueyn Runi, 36 yosh
Yil avvalida, aniqrog‘i 15-yanvar kuni “Manchester Yunayted” afsonasi Ueyn Runi faoliyatini yakunlaganini e’lon qildi. Garchi u 2020-yilning 25-noyabrida oxirgi o‘yinini o‘tkazgan bo‘lsa ham, yanvar oyiga kelibgina rasman katta sport bilan xayrlashishga qaror qildi. U ungacha so‘nggi ikki mavsum davomida Chempionship vakili “Derbi Kaunti”da harakat qilayotgandi (o‘ynovchi murabbiy rolida).
Futbolchi sifatida “Yunayted”dan tashqari, “Everton” va “Di Si Yunayted”da to‘p surgan Runi darhol murabbiylik faoliyatini boshlab yubordi, biroq hozircha bu borada muvaffaqiyat qozonishi oson kechmayapti. Uning boshqaruvidagi “Derbi Kaunti” 2020/21-yilgi mavsumda bazo‘r ligada jon saqlab qolgan bo‘lsa, ushbu mavsumda ham quyi pog‘onalarda bormoqda va katta ehtimol bilan quyi divizion (nufuz jihatdan Angliyaning 3-ligasiga) tushib ketadi.
Nuri Shahin, 33 yosh
O‘z vaqtida “Borussiya D”dagi o‘yinlari orqali futbol jamoatchiligining e’tiborini o‘ziga tortgan va hatto “Real”ga transfer qilingan Nuri Shahinni ko‘pchilik yaxshi eslasa kerak. “Real”da o‘z o‘rnini topa olmagan futbolchi qisqa vaqt davomida “Liverpul”da ijarada o‘ynaydi va keyinchalik yana qadrdon jamoasiga qaytadi. Kuchli beshlik chempionatlaridagi faoliyatini esa 2018-yilda “Verder” safida yakunlaydi. Uning keyingi manzili Turkiyaning “Antalyaspor”i bo‘ldi. Shahin u yerda 2020-yildan beri faoliyat yuritib kelmoqda. 2021-yilning 6-oktabrida, 33 yoshida esa “Antalyaspor”ning bosh murabbiyi etib tayinlandi. Dastlab uning murabbiylik bilan bir qatorda futbolchi sifatida ham faoliyat yuritishi aytilgandi, biroq 17-oktabrga borib rasman futbolchilik faoliyatini yakunladi.
Shahin legioner sifatida yomon natijalarga erishmagan. Uning shaxsiy yutuqlari orasida Bundesliga va Ispaniya La Ligasi chempionliklari bor. 2010/11-yilgi mavsumda esa Germaniya chempionatining eng yaxshi o‘yinchisi deb topilgan.
Sami Xedira, 34 yosh
Germaniya terma jamoasi safida 2014-yilgi Jahon chempionatida g‘alaba qozongan futbolchi ham 2021-yilga kelib, butun faoliyati davomida ta’qib qilib kelgan jarohatlar tufayli butsilarini “mixga ilishga” qaror qildi.
Xedira ham Nuri Shahin kabi Germaniya Bundesligasidagi o‘yinlari orqali nom qozonib, Madridning “Real” klubiga yo‘l olgandi. Biroq u turkiyalik futbolchidan farqli ravishda “qirollik klubi” safida o‘z o‘rnini topdi va 2010-yillarning o‘rtalarida tayanch zonasining tom ma’nodagi “qiroli”ga aylanadi. Joze Mourinyo va Karlo Anchelotti qo‘l ostida u asosiy tarkibning ajralmas qismi bo‘lib kelgan. Ammo keyinchalik, murabbiylarning almashishi bilan Sami kamroq o‘yin amaliyotiga ega bo‘ladi va “Yuventus”ga o‘tib ketadi. Mundial g‘olibi Italiyada ham tezda o‘z o‘rnini topib oldi va uzoq yillar davomida “keksa sinyora”ning A Seriyadagi g‘alabalariga hissa qo‘shib keldi.
2021-yil avvalida Xedira yana Bundesligaga qaytdi, u “Herta”da bir mavsum davomida harakat qilib, shundan so‘ng katta sport bilan xayrlashdi.
Ma’lumotlarga ko‘ra, “Yuventus”da o‘ynab yurgan kezlari shifokorlar unda yurak bilan bog‘liq muammolar borligini aniqlagan.
Aryen Robben, 37 yosh
“Bavariya” safida sakkiz karra Germaniya chempioni, “Chelsi” bilan 2-marta APLda g‘olib bo‘lgan, “Real” bilan Ispaniya chempionligini qo‘lga kiritgan Aryen Robben va uning faoliyati haqida ortiqcha gapirishning hojati yo‘q, aslida. Bundan tashqari bunga uning Chempionlar Ligasidagi g‘alabasi va terma jamoadagi o‘yinlarini ham qo‘shimcha qilish mumkin.
Niderlandiyalik futbolchi 2019-yilning yozida futbolchilik faoliyatini yakunlagani haqida e’lon qilgandi. Biroq oradan bir yil o‘tar-o‘tmas u yana katta sportga qaytganini ma’lum qildi va qadrdon “Groningen” klubi safiga qo‘shildi. Katta maqsadlar bilan qaytgan Robben Niderlandiya chempionatining ilk turidayoq mushaklaridan jarohat oldi va mavsumni rejadagidek o‘tkaza olmadi. Shunga qaramay u faoliyatining so‘ngida qadrdon jamoasiga yordam bera olganidan mamnun ekanligini bildirdi. 15-iyul sanasiga kelib, 37 yoshida yana bir bor faoliyatini yakunlaganini e’lon qildi.
Samir Nasri, 34 yosh
O‘z vaqtida “Arsenal” va “Manchester Siti”da Angliya Premyer Ligasini “yondirgan” Samir Nasri haqida gap ketganda ko‘pchilik uni qobiliyatidan to‘laligicha foydalanmagan o‘yinchi sifatida yodga oladi.
2017-yilda “Siti”dan ketgan fransiyalik futbolchi “Sevilya”, “Antalyaspor”, “Vest Hem” klublarida faoliyat yuritdi. Uning oxirgi klubi esa “Anderlext” bo‘ldi. U Belgiya klubi safida oxirgi marta 2020-yilda maydonga tushgandi. O‘sha yili tomonlar shartnomani bekor qilgan. Nasri 2021-yilning sentabr oyiga kelibgina rasman futbolchilik bilan xayrlashganini e’lon qildi. U bu qarorini doping bilan bog‘liq vaziyatdagi adolatsizliklar bilan bog‘ladi. Nasri 2018-yilda antidoping qoidalarini buzgani uchun yarim yilga futboldan chetlatilgandi, apellyatsiyadan so‘ng esa diskvalifikatsiya yana bir yilga uzaytirilgandi.
Qayd etib o‘tib ketish kerak, Nasri 2015-yilda ham Didye Desham bilan bo‘lgan mojarolar ketidan terma jamoadan arazlab ketayotganini e’lon qilgandi.
Mario Manjukich, 35 yosh
Xorvatiya afsonalaridan biri bo‘lgan Mario Manjukich sentabr oyida, 35 yoshida maydondagi faoliyatini yakunlashini ma’lum qildi. O‘tmishga nazar tashlanadigan bo‘lsa, hujumchi ko‘pchilik faqat havas qilishi mumkin bo‘lgan karyeraga erishdi. U qayerda o‘ynamasin, har doim jamoa uchun kurashardi va deyarli o‘zi o‘ynagan barcha klublar bilan sovringa ega chiqardi.
Terma jamoada esa u yuqorida ta’kidlanganidek, tom ma’nodagi afsona hisoblanadi. Mario 2018-yilgi Jahon Chempionatida finalgacha yetib borgan tarkibning asosiy figuralaridan biri bo‘lgan.
2019-yilda “Yuventus”dagi so‘nggi mavsumdan keyin Manjukich Qatar chempionatiga yo‘l oldi va u yerda bir mavsum harakat qildi. Manjuchik Qatar klubiga katta pul ortidan bordi va aytarli katta natijalarga erishmadi.
2021-yil avvalida esa “Milan” bilan shartnoma imzoladi, ammo avvalgi sport formasini tiklashi qiyin kechdi. Shundan so‘ng u to‘xtashga qaror qildi va darhol murabbiylik faoliyatini boshlab yubordi. Hozirda u mamlakat milliy terma jamoasida Zlatko Dalichga assistentlik qilmoqda.
Serxio Aguero, 34 yosh
“Manchester Siti” afsonasi Aguero 2021-yilning yozida Lionel Messi bilan bir jamoada to‘p surish uchun “Barselona”ga o‘tdi. Ammo oradan hech qancha vaqt o‘tmay, Leo jamoadan ketdi, o‘zi esa jarohat sabab uzoq vaqt davomida maydonga tusha olmadi. Oktabr oyiga kelib, barchasi joyiga tushgandek taassurot uyg‘ongandi.
Ammo 31-oktabr sanasida barchasi o‘zgarib ketdi: “Barselona” La Liga doirasida o‘z maydonida “Alaves”ni qabul qilayotgandi. Uchrashuvning 41-daqiqasida Aguero o‘zini yomon his qildi va maydonga yiqildi. Shifokorlar uning yuragida muammo borligini ma’lum qildi va Kun zaxiraga olindi. Dastlabki tibbiy ko‘rikdan so‘ng “Barselona” futbolchining ahvoli yaxshi ekanligi, ammo 3 oy davomida futbol o‘ynay olmasligi haqida ma’lumot berdi. Biroq 15-dekabr kuni Agueroga yurak taxikardiyasi tashxisi qo‘yildi va uning boshqa maydonga qayta olmasligi aniq bo‘ldi.
Aguero qarorini e’lon qilgan matbuot anjumanida ko‘z yoshlarini tiyib tura olmadi va bu hayotidagi eng qiyin tanlov bo‘lganini aytdi.
Raqobat o‘ta kuchli bo‘lgan bugungi futbol muhitida barcha muxlislarning qalbidan birdek joy olish imkonsiz ish, ammo Aguero buni uddalagan kam sonli o‘yinchilardan bo‘lib millionlar o‘yini tarixidan joy oladi.
Bonus: Odil Ahmedov, 34 yosh
O‘zbek futboli uchun ham 2021-yil voqealarga boy bo‘ldi. Superliga jamoalari murabbiylarining “portlashi”, Eldor Shomurodovning “Roma”ga o‘tishi va milliy terma jamoaning JCh saralashlari tarixidagi eng yomon natijasi shular jumlasidandir.
Shuningdek, Odil Ahmedovning katta futbol bilan xayrlashgani haqidagi xabar ham ko‘pchilik uchun kutilmagan voqea bo‘ldi. Ahmedov 18-dekabr kuni “Orzuning shonli yo‘li” nomli kitobining taqdimot marosimida butsilarini mixga ilganini e’lon qildi:
Bugun sizning ko‘z oldingizda futbolchilik faoliyatimni tugatganimni e’lon qilaman. Bu juda og‘ir qaror. Bir umr futbolga oshno bo‘lganman, endi undan ayrilish juda ham qiyin. Ko‘pchilik futbol o‘ynashda davom etishim kerakligini ta’kidladi. Men uchun futbol o‘ynash — maydonda borini berish deganidir. Shunchaki familiya maydonda yurishi kerak emas. Shuning uchun ushbu qarorimni to‘g‘ri deb qabul qilaman.Darhaqiqat, Odil yuqori notada ketdi. U Superliga klublarida yana bir necha yil davomida harakat qilishi mumkin edi, biroq u muxlislarning (balki o‘zining ham) yodida kuchli, kurashlardan qo‘rqmaydigan va vatanparvar sardor sifatida qolishni istadi.Odil Ahmedov
Odilning so‘nggi jamoasi Xitoyning “Chanchjou Mayti Layons” klubi bo‘ldi. Endilikda u O‘FA vitse-prezidenti sifatida faoliyat yuritadi. Shuningdek, u asosiy vaqtini “Odil Junior”ga bag‘ishlashini ma’lum qildi.
Izoh (0)