Odil Ahmedov futbolchilik faoliyatini 33 yoshdayoq tugatishiga nima sabab bo‘lganini ma’lum qildi

O‘zbekiston milliy terma jamoasining sobiq sardori Odil Ahmedov futbolchilik faoliyatini yakunlaganiga nima sabab bo‘lganini aytdi.

“Menda BAA va Qatar klublaridan 2-3 ta variant bor edi. Biroq ularning hech birini ko‘rib chiqmaganman. Darhol rad javobini berdim. Otamning o‘limi sabab faoliyatimni yakunlashga qaror qildim.

2020-yilda otam koronavirusga chalindi. Afsuski, uni yenga olmadi. Shundan keyin futbol o‘ynash istagi va ishtiyoqi yo‘qoldi. Ko‘p vaqtimni oilam bilan o‘tkazdim. 11 yil davomida legioner bo‘ldim, shu bois O‘zbekistonda kam bo‘lardim.

Hozircha o‘zimni murabbiylikda ko‘rmayapman. Balki ma’lum vaqt o‘tib bu haqida o‘ylab ko‘rarman”, — deydi Odil Ahmedov.

Ahmedov 2021-yil dekabrida futbolchilik faoliyatini yakunlashini ma’lum qilgandi. O‘sha oyda Odil O‘FA vitse-prezidenti lavozimiga saylangan.

“Paxtakor” tarbiyalanuvchisi hisoblangan Ahmedov faoliyati davomida “Paxtakor” (2006—2011), “Anji” (2011—2014), “Krasnodar” (2014—2016), “Shanxay SIPG” (2017—2021), “Chanchjou Mayti Layons” (2021) kabi jamoalarda to‘p surgan.

Mavzuga doir:

• “Qiyinchiliklar vaqtida, futbolni tashlab ketar mahalim yana maydonga qaytargan inson otam bo‘ladi”. Odil Ahmedov faoliyati va marhum otasi haqida
• Ueyn Runi, Serxio Aguero va Odil Ahmedov. 2021-yilda faoliyatini yakunlagan taniqli futbolchilar