AQSHning Nyu-York shahrida shaxmat bo‘yicha rapid va blis yo‘nalishlari bo‘yicha jahon chempionati bo‘lib o‘tmoqda.
Musobaqaning uchinchi kuni rapid bo‘yicha so‘nggi 3 ta partiyalari o‘ynaldi. O‘zbekiston terma jamoasining yetakchi grossmeysterlari ham sovrinli o‘rinlar uchun bahs olib bordi. Blits va rapid bo‘yicha amaldagi jahon chempioni Magnus Karlsen 8-turdan keyin musobaqani tark etgandi. Shu bois, har ikki yo‘nalishda ham yangi chempion aniqlanadi.
Kutilmaganda rapid bahslarida 18 yoshli Volodar Murzin (2588) eng tajribali raqiblarini ortda qoldirib, jahon chempioniga aylandi. FIDE bayrog‘i ostida harakat qilayotgan rossiyalik iqtidor egasi 13 imkoniyatdan 10 ochko jamg‘arib, chempionlikni qo‘lga kiritdi. Qiziqarlisi, shaxmatchi musobaqada 59-raqamda tasniflangan edi. U so‘nggi 13-turda armanistonlik Karen Grigoryan bilan durang qayd etdi va bu uning jahon chempionligi uchun yetarli bo‘ldi.
Eʼtiborlisi, uchchala sovrinli o‘rin ham rossiyalik shaxmatchilarga nasib etdi. Aleksandr Grishuk (2675) 9,5 ochko bilan ikkinchi o‘rinni egallagan bo‘lsa, shuncha ochkoga ega Yan Nepomnyashiy (2758) qo‘shimcha ko‘rsatkichlarga ko‘ra kuchli uchlikka yakun yasab berdi.
Keyingi o‘rindagi olti nafar ishtirokchi 9 ochkodan jamg‘ardi. Ular orasida Javohir Sindorov (2655) ham bor. O‘zbekistonlik sportchi 11-turda Nikolas Teodorou bilan durang qayd etdi, 12-turda Andrey Volokitinni, so‘nggi 13-turda reytingda o‘zidan ancha yuqorida borayotgan polshalik taniqli grossmeyster Yan-Krishtof Dudani mag‘lub etdi. Javohirning sovrinli o‘rinlardan birini egallashi uchun yarim ochko yetmay qoldi. Yan Nepomnyashiy bilan o‘zaro uchrashuvdagi mag‘lubiyat unga pand berib qo‘ydi.
Sovrinli o‘rinlar uchun daʼvogarlar qatorida eʼtirof etilgan Nodirbek Abdusattorov (2740) rapid bo‘yicha jahon chempionatini ko‘ngildagidek o‘tkaza olmadi. U so‘nggi kungi 3 ta partiyadan 2 tasida mag‘lubiyat qayd etib, top 10 talikdan chiqib ketdi. Nodirbek 13 imkoniyatdan 8 ochko to‘plab, qo‘shimcha ko‘rsatkichlarga ko‘ra 28-o‘rin bilan cheklandi. Abdusattorov rapid bahslarida 9-raqam ostida tasniflangan edi.
Bundan tashqari, Jahongir Vohidov 7,5 ochko bilan qo‘shimcha ko‘rsatkichlarga ko‘ra 48, Muhiddin Madaminov 7 ochko bilan 86, Shamsiddin Vohidov esa 5,5 ochko bilan 131-o‘rin bilan kifoyalandi.
Ayollar o‘rtasidagi musobaqa Afruza Hamdamova (2188) O‘zbekiston sharafini himoya qilmoqda. Yoshlar o‘rtasida ikki karra jahon chempioni bo‘lgan Afruza tarixiy natija qayd etdi. U 11 imkoniyatdan 8 ochko jamg‘arib, qo‘shimcha ko‘rsatkichlarga ko‘ra 6-o‘rinni egalladi. Afruza so‘nggi kun oldidan 5,5 ochko bilan 15-pog‘onada borayotgandi.
Hamdamova kecha tunda o‘tkazilgan 3 ta partiyadan 2 tasida g‘alaba, 1 tasida durang qayd etdi. Musobaqa davomida faqat bitta uchrashuvda imkoniyatni boy berdi. Turnirda 83-raqam ostida tasniflangan Hamdamova uchun bu haqiqatan ham tarixiy natija. Afruza 6 g‘alaba, 4 durang va 1 mag‘lubiyat evaziga 8 ochko jamg‘ardi.
O‘zbekistonlik shaxmatchi chempion Hampi Koneru (Hindiston, 2431) dan bor yo‘g‘i yarim ochko kam to‘pladi. Kuchli uchlikdan joy olgan Ju Ven Jun (Xitoy, 2536) va Katerina Lagno (FIDE, 2433) bilan bir xil ochkoga ega bo‘ldi, ammo qo‘shimcha ko‘rsatkichlar sabab sovrindorlar qatoridan joy olmadi.
Afruza Hamdamova musobaqa davomida ikki karra jahon chempioni, blits yo‘nalishida amaldagi jahon chempioni rossiyalik Valentina Gunina (FIDE, 2388) ni mag‘lub etdi. Qozog‘istonlik grossmeyster, blits yo‘nalishida ikki karra jahon chempioni Bibisara Assaubayeva (2444), rossiyalik jahon chempioni Katerina Lagno (2433), ukrainalik jahon chempioni Anna Muzichuk (2408) singari nomdor shaxmatchilar bilan durang o‘ynadi.
AQSH sharafini himoya qilayotgan Gulruhbegim Tohirjonova 11 imkoniyatdan 5 ochko jamg‘arib, qo‘shimcha ko‘rsatkichlarga ko‘ra 65-o‘rin bilan kifoyalandi. U rapid bahslarida 3 g‘alaba, 4 durang va 4 ta mag‘lubiyat qayd etdi. Gulruhbegim turnirda 42-raqam ostida tasniflangandi.
Maʼlumot uchun, ertaga, 30-dekabr kunidan shaxmatning blits, yaʼni tezkor shaxmat bo‘yicha jahon chempionati boshlanadi.
Izoh (0)