Birinchi xonimning maqomi har qanday ayolni mashhur qilishi mumkin, hatto uning barcha shaxsiy va kasbiy yutuqlari “muvaffaqiyatli nikoh” nuqtasida yakunlangan bo‘lsa ham. Mashhur qo‘shiqchi, aktrisa, raqqosa va modellardan qaysi biri o‘z mamlakatining birinchi xonimi bo‘lish sharafini qo‘lga kiritgani va erlari hokimiyat tepasiga kelganidan keyin ularning karyerasiga nima bo‘lgani haqida ma’lumot beramiz.
Karla Bruni-Sarkozi
Nikolya Sarkozining uchinchi rafiqasi model bo‘lgan. Uning kiyinish uslubi va garderobidagi liboslar siyosatga modani olib kelgan desa ham xato bo‘lmaydi. Kiyinishi sabab uni Jaklin Kennediga qiyoslashadi. Musiqachilar oilasida dunyoga kelgan Bruni voyaga yetganida ijod yo‘lidan ketishga qaror qilgan. Maktabni bitirganidan keyin arxitektor bo‘lishni rejalashtirgan. Ammo modellik karyerasini boshlab yuborgan, City Models bilan shartnoma imzolaganida endigina 19 yoshga to‘lgan edi.
Muvaffaqiyatli loyiha va hamkorliklar uning mashhur bo‘lishiga sabab bo‘lgan. Hali tanilib ulgurmasidan moda olamining titanlari hisoblangan Dior, Givenchy, Chanel, Yves Saint-Laurent va boshqa brendlar bilan hamkorlik qilgan. 90-yillardagi mashhur modellar haqida gap ketganida Karlaning ismini tilga olmasdan iloj yo‘q.
Ammo Karla faqatgina modellik bilan cheklanmagan, u ijod qilish, albom yozish, qisqa qilib aytganda, musiqiy karyerasini ham maromiga yetkazgan. Albom taqdim qilgan, mukofotlarni qo‘lga kiritgan sobiq birinchi xonim ayni vaqtda ham musiqa bilan shug‘ullanib turadi. Qolaversa, u Yelisey saroyida yashagan vaqtida ham ijodni tashlab qo‘ymagan. Turmush o‘rtog‘i prezident bo‘lganining birinchi yilidayoq Comme si de rien n’était albomini taqdim qilgan. Albom sotuvidan tushgan mablag‘ esa xayriya ishlariga sarflangan. 2011-yilda esa u rejissor Vudi Allenning filmida suratga tushishga ham muvaffaq bo‘lgan. Umuman olganda, Karla turmush o‘rtog‘idan qolishmaydigan darajada mashhur. Ayni vaqtda ham mavqeyini ushlab turishga harakat qiladi va musiqiy karyerasini davom ettirib keladi.
Melaniya Tramp
Donald Trampning uchinchi rafiqasi Melaniya kommunistik mamlakatda dunyoga kelgan yagona birinchi xonim sanaladi. U Lyublyanada dunyoga kelib, model sifatida karyera qilish uchun u yerni tark etgan. U bolaligida Sloveniyadagi bolalar moda chiqishida ishtirok etgan, 16 yoshida esa ilk marta professional fotosessiyada o‘zini sinab ko‘rgan.
U Karla Bruni singari mashhur bo‘lmagan bo‘lsa ham moda olamida o‘ziga yarasha nom qozonishga muvaffaq bo‘lgan: modellik agentlari bilan shartnoma tuzib, moda chiqishlari, jurnal muqovasi uchun suratlar hatto go‘zallik tanlovida ishtirok etgan. Trampning do‘sti Paolo Zampolli uni payqab, Nyu-Yorkda model sifatida faoliyat yuritishni taklif qilmaganida, AQSHga ko‘chib borish uning xayolining ko‘chasiga ham kelmagan bo‘lardi. Shu bahona bo‘lib Tramp va Melaniya tanishib qoladi.
Shundoq ham chiroyli va latofatli bo‘lgan Melaniyaning ishlari Tramp bilan tanishuvidan keyin yanada yurishib ketadi. Model sifatida karyerasi gullab-yashnaydi, reklama agentlaridan takliflar kelib tusha boshlaydi. Keyinroq Melaniya kosmetik brendga, zargarlik buyumlari kolleksiyasiga asos soladi. Xullas, Oq uyning bekasiga aylanguniga qadar ham Melaniya o‘ziga yarasha mashhur bo‘lgan.
Sofi Greguar-Tryudo
Zamonamizning eng kelishgan va mashhur siyosatchilaridan biri bo‘lgan Kanada bosh vaziri Jastin Tryudoning rafiqasi Sofi nomini avval butun dunyo aholisi bo‘lmasa ham Kanadaning Kvebek provinsiyasidagi har ikkinchi odam bilgan.
Bunga uning muntazam ravishda ekranlarda turli ko‘rsatuv dasturlarda chiqishi sabab bo‘lgan. Yoshligida fotomodel, reklamachi bo‘lib faoliyat olib borgan Sofi jurnalistika sohasiga juda ham qiziqqan. Mahalliy radio-televideniye maktabini tamomlaganidan keyin LCN telekanalida ishlay boshlagan. Media sanoatidagi faoliyati sabab ham u turmush o‘rtog‘ini uchratgan. Mercedes-Benz tomonidan tashkil qilingan xayriya tadbirida boshlovchilikka taklif qilinadi va aynan shu tadbirda Jastin ham qatnashadi.
Pen Liyuan
Xitoy raisi Si Szinpin mashhurlikda rafiqasi Pendan ortda desa ham xato bo‘lmaydi. Ular yoshligidayoq bir-biriga ko‘ngil qo‘yib uchrashishni boshlagan, ammo bu vaqtda Si endigina siyosatga qadam qo‘ygan yigitcha bo‘lsa, Pen Xitoy estradasida o‘z o‘rnini topib bo‘lgan yulduz edi. Pen ijod muhiti hukm surgan oilada dunyoga kelgan va musiqaga qiziqa boshlagan.
Uning onasi opera yo‘nalishida ijod qilganiga qaramay, Pen harbiy qo‘shiqlar kuylashni afzal bilgan. Barcha davlat tadbirlari usiz o‘tmaydigan bo‘lib qolgan va vatanparvarlik ruhidagi qo‘shiqlar bilan muxlislar qalbidan joy olgan. Birinchi xonim sifatida Pen bugungi kunda chiqish qilmay qo‘ygan bo‘lsa ham onda-sonda muxlislar ko‘zini quvnatib turadi.
Veronika Lario
Silvio Berluskonining rafiqasi Veronika teatr va kino aktrisasi bo‘lgan, ammo yuqoridagi xonimlar singari mashhur bo‘lmagan. U aktrisalikni 70-yillar o‘rtasida teatrdagi pyesa va seriallarda kichik rollardan boshlagan va bu vaqtda Italiyada mashhur bo‘lgan rejissor va aktyor Enriko Mariya Salerna bilan sevishib yurgan.
Aynan Enriko aktrisa ishtirokidagi pyesalarni sahnalashtirgan. Ijro davomida Larioning latofati va aktrisalik mahorati Berluskonining ham e’tiborini tortgan. Veronika u bilan rasmiy turmush qurguniga qadar ham 10 yil birga yashagan va aynan shu vaqtda bir necha mashhur filmlarda suratga tushgan. Ammo turmush o‘rtog‘ining xiyonatidan keyin ajrashgan va shundan keyin boshqa aktrisalar Berluskonining qalbini zabt etgan ayol rolini ijro qilishni orzu qila boshlagan.
Nensi Reygan
Nensi Reygan nomi bilan mashhur bo‘lgan Anna Frensis Robbins filmlarda turli rollarni ijro etgan. Uning onasi teatr va kino aktrisasi bo‘lgan va Ketrin Xepbern bilan dugona edi, shuning uchun yosh Nensi drama bo‘limiga o‘qishga kirib, karyerasini tez va muammosiz quradi.
Qiziqarli biografik fakt: qiz asosiy rollaridan birini o‘rta maktabda, unga Jorj Kaufmanning “Birinchi xonim” pyesasi asosidagi maktab spektaklida bosh rolni berishganda o‘ynaydi.
Ko‘plab tanqidchilar Nensining yulduz bo‘lish uchun yetarlicha iste’dodli emas edi deb hisoblaydi. Ammo uning yana bir jihati bor edi: u foydali aloqalar o‘rnatish va suhbatdoshlarini maftun etishni bilardi. Garchi Gollivud unga o‘zi xohlagan unvonni bermagan bo‘lsa-da, Ekran aktyorlari gildiyasi prezidenti bo‘lib ishlagan bo‘lajak eri bilan tanishishiga sababchi bo‘lgan. Uning ismi ko‘pchilikka ma’lum: bu Ronald Reygan edi.
Nikohdan keyin bo‘lajak prezidentdan farqli o‘laroq Nensi kinodagi karyerasini tark etadi va faqat kichik spektakllar hamda dasturlarda paydo bo‘ladi, oilasini birinchi o‘ringa qo‘yadi. Biroq er-xotin bir filmda birgalikda rol o‘ynashgan — 1957-yilda “Dengiz jodugarlari” filmida. Ular filmda asosiy rollarni o‘ynagan.
Izoh (0)