Rossiya prezidenti Vladimir Putin yaqin haftalarda Shimoliy Koreya va Vyetnamga tashrif buyurishi kutilmoqda. Bu haqda “Vedomosti” xabar berdi.
Rossiyaning Shimoliy Koreyadagi elchisi Aleksandr Matsegora Putinning Pxenyanga tashrifiga faol tayyorgarlik ko‘rilayotganini tasdiqlagan.
Vyetnamga safar KXDR prezidenti tashrifidan so‘ng darhol iyun oyida bo‘lishi mumkin, — deyiladi xabarda.
Bungacha Rossiya prezidenti yordamchisi Yuriy Ushakov Putin 3-4-iyul kunlari bo‘lib o‘tadigan Shanxay hamkorlik tashkilotining Ostona sammitida ishtirok etish niyatida ekanini ma’lum qilgandi. Ushakovga ko‘ra, boshqa tashriflar haqida gapirishga hali erta, lekin ular albatta sodir bo‘ladi.
Putin hokimiyatdagi 24 yillik faoliyati davomida Shimoliy Koreyaga faqat bir marta, 2000-yilda birinchi prezidentlik muddati boshlanganda tashrif buyurgan. KXDRning amaldagi rahbari Kim Chen In Rossiyaga oxirgi marta o‘tgan yilning sentyabrida tashrif buyurgan edi.
Putin Vyetnamga to‘rt marta tashrif buyurgan – oxirgisi 2017-yilning noyabrida, mamlakatda APEK sammiti bo‘lib o‘tgan edi. U yerda Rossiya prezidenti AQSHning o‘sha paytdagi prezidenti Donald Tramp bilan uchrashgan, shuningdek, Yaponiyaning sobiq bosh vaziri Sindzo Abe va Xitoy rahbari Si Szinpin bilan muzokaralar o‘tkazgan. Putinning Vetnamga so‘nggi rasmiy tashrifi 2013-yilning noyabrida bo‘lib o‘tgan.
Shimoliy Koreya Ukrainaga qarshi urushda Rossiyani qurol-yarog‘ bilan qo‘llab-quvvatlamoqda. Pxenyan Moskvaga o‘q-dorilar va boshqa harbiy texnikalar solingan jami 7 mingga yaqin konteynerni topshirgan, — dedi Janubiy Koreya mudofaa vaziri Shin Von Sik.
Unga ko‘ra, Rossiya armiyasi Shimoliy Koreyadan 3 million 152 mm ga yaqin snaryad olishi mumkin. Harbiy yordam evaziga Rossiya KXDRga 9 mingdan ortiq konteynerni boshqa tovarlar bilan yetkazib bergan.
Izoh (0)