Qashqadaryo viloyatining Nishon tumanida faoliyat yurituvchi fermer-tadbirkor Ashurali Boltayev MIBning Nishon tumani bo‘limidan 355 million so‘m miqdorida kompensatsiya undiradigan bo‘ldi. Bu haqda Oliy sud sudyasi Rustamov boshchiligidagi sudlov hay’atining yangi qarori e’lon qilindi.
O‘zbekiston fermer-dehqon xo‘jaliklari va tomorqa yer egalari Nishon tuman kengashining taftish tartibidagi shikoyati qisman qanoatlantirilsin. O‘zbekiston Respublikasi bosh prokurori o‘rinbosarining ishni taftish tartibida ko‘rib chiqish haqidagi protesti qisman qanoatlantirilsin.
Qashqadaryo viloyati sudi iqtisodiy ishlar bo‘yicha sudlov hay’ati apellyatsiya instansiyasining 2024-yil 18-apreldagi hamda Samarqand viloyat sudi iqtisodiy ishlar bo‘yicha sudlov hay’ati taftish instansiyasining 2024-yil 1-avgustdagi qarori bekor qilinsin.
Qarshi tumanlararo sudining 2024-yil 5-fevraldagi hal qiluv qarori o‘z kuchida qoldirilsin. Ishni ko‘rish bilan bog‘liq sud xarajatlari javobgarga yuklatilsin. Apellyatsiya hamda taftish instansiya sudi qarorlari bo‘yicha undiruvlar bekor qilinsin, dedi sudya Rustamov sudlov hay’ati qarorini o‘qib eshittirar ekan.
Sudya Rustamovning eslatishicha, mazkur qaror qabul qilingan kundan e’tiboran qonuniy kuchga kiradi.
Mazkur qarordan norozi taraf O‘zbekiston Respublikasi Oliy sudi raisi hamda O‘zbekiston Respublikasi Bosh prokurori nomiga ishni rayosatda ko‘rish haqida protest keltirish bo‘yicha ariza berishlari mumkin, dedi raislik etuvchi sudya.
Sudya yangi qaroriga izoh berar ekan, fermer va MIB o‘rtasidagi muammoni ko‘rib chiqqan apellyatsiya instansiyasi birinchi instansiya qarorini bekor qilishda talablar va dalillarga yetarli darajada baho bermaganini ta’kidladi.
- Eslatib o‘tamiz, Nishon tumanida faoliyat yurituvchi fermer MIBning Nishon tuman bo‘limi haydov traktorini noqonuniy 49 kun ushlab turgani uchun byurodan 355 million so‘m zararini qoplatishga urinib, sudga bergandi.
- Dastlabki instansiya sudlaridan Qarshi tumanlararo iqtisodiy sudi 2024-yil 5-fevraldagi hal qiluv qarori bilan fermer da’vosini qisman qanoatlantirib, javobgardan da’vogar foydasiga 355 million 242 ming so‘m boy berilgan foydani undirishni belgilagandi.
- Keyinchalik yuqori turuvchi instansiyalar mazkur qarorni bekor qilib, fermerning da’vo talabini rad etdi.
- Shu sabab fermer Oliy sudga murojaat qilgandi.
Izoh (0)