AQSHning San Antonio shahrida prezident Donald Trampga tahdid qilishda ayblanayotgan 52 yoshli erkak qamoqqa olindi. Bu haqda Texas shtatining G‘arbiy okrugi prokurori idorasi ma’lum qildi.
Tergov ma’lumotlariga ko‘ra, qamoqqa olingan shaxs — Robert Errera — Facebook’da Trampning sel oqibatida zarar ko‘rgan shtatga rejalashtirilgan tashrifi oldida unga tahdidli izohlar yozgan. U postning ostiga “Men aniq nishonga olaman”, degan jumlani yozib, Trampning o‘tgan yilning iyulida yuz bergan suiqasd kuni tushirilgan suratini ilova qilgan. Boshqa bir postida u hujum miltig‘i va o‘qdonlar suratini ham joylashtirgan.
Errera o‘sha kuniyoq qamoqqa olingan. Unga qo‘yilgan har bir ayb bo‘yicha besh yilgacha qamoq jazosi tahdid solmoqda. Hozirda tergov ishlari bilan Federal qidiruv boshqarmasi, San Antonio politsiyasi va AQSH Maxfiy xizmati shug‘ullanmoqda.
Shuningdek, komik Sebastyan Xots X ijtimoiy tarmog‘ida AQSH prezidenti Donald Trampga suiqasd uyushtirilishini ma’qullagan posti uchun Berlin sudi oldida javob berishi ma’lum bo‘ldi.
Nashrning yozishicha, komediyachi hukm chiqarilgunga qadar izoh berishdan bosh tortgan. Bunga uning 14-iyul kuni Trampga hujumdan so‘ng e’lon qilingan va keyinroq o‘chirib tashlangan “Fashistlarning o‘limi mutlaqo ajoyib”, degan posti sabab bo‘lgan.
Trampga birinchi suiqasd 2024-yil 13-iyulda Pensilvaniyada sodir bo‘lgan — u qulog‘idan jarohat olgan. Bir kishini qutqarib qolishning iloji bo‘lmadi, yana ikki kishi yaralandi. Hujumchi yo‘q qilindi. Ikkinchi hujum sentyabr oyida sodir bo‘lgan — qurollangan jinoyatchi Trampning Floridadagi golf klubida qo‘lga olindi.
Izoh (0)