Farg‘onadagi shifoxonada chap oyog‘i kesilishi kerak bo‘lgan bemorning o‘ng oyog‘i kesib tashlandi. Bu haqda “Millar” dasturida xabar berildi.
Bemor ayolning o‘g‘li onasi 10 yildan buyon qandli diabet kasalligi bilan kurashayotganini aytdi. Uning aytishicha, ayolning chap oyog‘i uch marta shifoxonada kesilgan.
“O‘ng oyoqlari o‘zlari uchun juda zarur. ‘Istoriya’ga ham chap oyoq deb yozilgan. Olib kirishdi-yu, o‘ng oyoqni kesib, menga olib chiqib berishdi. Men to‘polon qilib gapirgandim, keyin chap oyoqni kesishdi. Lekin ungacha o‘ng oyoqni menga olib chiqib berishgan edi”, deydi bemorning o‘g‘li.
U operatsiyadan avval o‘zidan ruxsat so‘rashmaganini taʼkidladi.
“Mendan hech narsani so‘rashmadi. Intervyuda eshitdim, o‘ng oyoqda tromb bor, deyishdi. Nimaga o‘zlari birinchi ko‘rsatmada yozilgan oyoqni olmasdan, o‘ng oyoqqa teginishdi? Onamning oyoqlarini umuman qaytarib bera olishmaydi. Hukumatimizdan qonuniy chora ko‘rishlarini so‘rayman”, deya qo‘shimcha qiladi ayolning o‘g‘li.
Oyoqlari kesilgan bemor operatsiyada nimalar bo‘lganini bilmasligini aytdi.
“Mana endi ikkalasi ham yo‘q. O‘ng oyoqni avval kesamiz, deyishmagandi. Agar bilganda, o‘g‘lim, kelinim kestirmas edi”, deydi bemor ayol.
Respublika ixtisoslashtirilgan Endokrinologiya ilmiy-amaliy tibbiyot markazi Farg‘ona filiali xirurgiya bo‘limi mudiri v.b. Davlatjon Ergashevning aytishicha, bemorga rejali ravishda chap oyoq son amputatsiyasi jarrohlik amaliyoti amalga oshirilishi kerak bo‘lgan.
“Operatsiya jarayonida operator-xirurg tomonidan bemorning o‘ng oyog‘ida ham kritik ishemiya aniqlangan. Bemorning hayotini saqlab qolish maqsadida xirurg tomonidan o‘ng oyoq son amputatsiyasi amaliyoti ham bajarilgan. Bemorning hozirgi paytdagi ahvoli stabil. Reanimatsiyada, shifokorlar nazoratida qolmoqda”, deydi Davlatjon Ergashev.
Mazkur holat yuzasidan Farg‘ona tumani prokuraturasi tomonidan tergovga qadar surishtiruv ishlari olib borilmoqda.
Shu bilan birga, sud tibbiy ekspertizasi tayinlangan.
Izoh (1)
Эх, Ўзбекистон.
Нималар бўляпти, ўзи.
Тиббийот сохасига, хохлаганларни эмас, ОЛЛОХ нимадир берганларни қабўл қилиб ўқитиш керак.
Тиббийот сохасига контракт, суперконтракт бўлиши бу, ўзи нотўғри.