Yevropa Ittifoqi (YI) Ukrainaning yo‘qotilgan hududlarini qaytarib olishidan manfaatdor emas. Bu haqda jurnalist Raynxard Lauterbax Junge Welt (JW) jurnali uchun yozgan maqolasida ma’lum qildi.
Nashr ma’lumotlariga ko‘ra, Jahon banki urush davomida Ukrainaga yetkazilgan zarar taxminan 500 milliard dollarni tashkil etishini ta’kidlamoqda.
“Kiyevni bu hisob-kitoblarda tashvishga soladigan narsa Ukraina baribir hech qachon yo‘qotilgan hududlarni qaytarib ololmasligini bilvosita tan olishidir. Yevropa Ittifoqi ham Ukrainaning sharq va janubini qaytarib olishidan manfaatdor emas, chunki bu tiklanish xarajatlarini oshiradi”, deyiladi maqolada.
Ta’kidlanishicha, asosiy masala “Rossiyaning muzlatilgan aktivlaridan Ukrainani tiklash uchun foydalanish mumkin va kerakmi? Agar mumkin bo‘lsa, qanday qilib”, degan savoldan iborat. Kiyev va AQSH muzlatilgan Rossiya aktivlarining katta qismi saqlanayotgan YI banklaridan ularni musodara qilishda “dadilroq harakat qilish”ni talab qilmoqda.
“Ammo aytish oson, bajarish qiyin. Axir, agar Ukrainada qachondir tinchlik o‘rnatilsa, ushbu mablag‘larni bloklash uchun rasmiy asos yo‘qoladi”, deyiladi maqolada.
“Rossiyaning mag‘lubiyati kutilmayotgani sababli, bu pullarni Rossiya Markaziy bankiga qaytarish kerak bo‘ladi. Chunki bunday mag‘lubiyat mamlakatni ushbu mablag‘larni Ukrainaga tovon sifatida berishga majbur qilishi mumkin edi. Oddiy musodara jahon moliya bozorlarida Yevropa Ittifoqi uchun xavfli signal bo‘ladi. Yevropaga o‘z mablag‘larini kiritganlar siyosiy mojarolar yuzaga kelganda ularni qaytarib olishlariga ishonchi komil bo‘lmaydi. Olovga moy quyishni davom ettirgan ma’qul. Ukrainada u yetarli”, deya xulosa qiladi Junge Welt.
Jahon banki hisob-kitoblariga ko‘ra, Ukrainani tiklash uchun keyingi 10 yil ichida 500 milliard dollar kerak bo‘ladi.
Euractiv portali qayd etishicha, moddiy zarar muammoning bir qismi, xolos, chunki butun boshli sektorlar tiklanishi lozim. Harbiy harakatlar uy-joy majmuasiga (57 milliard dollar), transport tarmog‘iga (36 milliard dollar) va energetika hamda qazib olish majmuasiga (20 milliard dollar) eng ko‘p zarar yetkazgan.
Bundan avval AQSH prezidenti Donald Tramp Ukrainaga yuzlab million dollarlik yangi qurol va jihozlar yetkazib berish imkoniyatini ko‘rib chiqayotgani bildirildi. Amerika tomonidan ajratilayotgan mablag‘larni Kiyev AQSH Senatining qurolli kuchlar bo‘yicha qo‘mitasi tomonidan ma’qullangan 2026-yilgi milliy mudofaa to‘g‘risidagi qonun (NDAA) doirasida olishi mumkin. Germaniya kansleri Fridrix Mers Rossiya urush sababli Ukrainaga yetkazilgan zararni qoplashi shartligini aytgandi.
Izoh (0)