Bugun, 11-dekabr kuni bo‘lib o‘tgan Oliy Majlis Qonunchilik palatasining navbatdagi majlisida Maʼmuriy javobgarlik to‘g‘risidagi kodeksga jamoat transportidan foydalanish samaradorligini oshirishga qaratilgan o‘zgartirish va qo‘shimchalar kiritishni nazarda tutuvchi qonun loyihasi birinchi o‘qishda ko‘rib chiqildi.
Qonun loyihasini Korrupsiyaga qarshi kurashish va sud masalalar qo‘mitasi birinchi o‘qishga kiritgan. Tashabbuskor Ichki ishlar vaziriligi, loyiha bo‘yicha vazirning o‘rinbosari Ramazon Ashrapov chiqish qildi.
Vazir o‘rinbosarining aytishicha, taklif etilayotgan qonun loyihasini ishlab chiqish zarurati bugungi kunda qonunchilikda jamoat transporti uchun alohida ajratilgan yo‘laklarda harakatlangan transport vositalari haydovchilari uchun javobgarlik choralari nazarda tutilmagan. Natijada boshqa transport vositalari mazkur yo‘laklarda bemalol harakatlanib, jamoat transportining harakatiga jiddiy to‘sqinlik qilmoqda.
Qonun loyihasiga ko‘ra, Maʼmuriy javobgarlik to‘g‘risidagi kodeksning yangi 128 prim 7-moddasiga kiritilib, jamoat transporti uchun alohida ajratilgan yo‘laklarda harakatlanish qoidalarini buzganlik uchun javobgarlik belgilamoqda. Xususan, mazkur moddani birinchi qismida ushbu qoida buzilishini birinchi marta sodir etganlik uchun BHMning uch baravar miqdorida — 1 million 125 ming so‘m jarima belgilamoqda. Ikkinchi qismida ushbu qoida buzilish jazo qo‘llangandan keyin bir yil davomida takroran sodir etilgan bo‘lsa, BHMning besh baravar miqdorda — 1 million 875 ming so‘m jarima belgilanmoqda. Uchinchi qismida, yonida joylashgan jamoat transport uchun alohida ajratilgan yo‘lakni bo‘shatgan holda yo‘lni qatnov qismida o‘tayotgan transport vositalariga yo‘l bermaslik BHMning bir baravar miqdorida — 375 ming so‘m jarima belgilamoqda.
Qonunchilik palatasining spikeri Nuriddin Ismoilovning aytishicha, qonun loyihasidagi normalarni o‘rnini bosuvchi normalar Maʼmuriy javobgarlik to‘g‘risidagi kodeksida bor.
Maʼmuriy javobgarlik to‘g‘risidagi kodeksda 128-modda bor — haydovchilarning transport vositalarini piyodalar yo‘laklaridan yurishi, yo‘l belgilari va yo‘l harakatining boshqa talablari qoidalariga rioya etmasligi uchun javobgarlikni ko‘zda tutadi. Agar jamoat transporti uchun joy ajratilsa, uni belgisi bo‘ladi va belgiga kirish mumkin emas, degan tartib bo‘ladi. Demak, kirib qolsa, unga javobgarlik bor. Yana alohida jamoat transporti uchun alohida ajratilgan yo‘laklarda harakatlanish qoidalarini buzish normasi? Jamoat transporti uchun ajratilgan yo‘laklarda harakatlanish qoidasi bormi? Umuman olganda transport haydovchisi hamma narsaga alohida-alohida javobgarlik bo‘lyapti. Xalqaro tajriba boshqacharoq, ularda yaxshi ishlangan. Biz har bitta harakatga javobgarlik o‘rnataversak qanday bo‘ladi?, dedi Nuriddin Ismoilov.
Spikerning alohida taʼkidlashicha, jazo choralari kuchaytirilaverilsa, saylovchilar “Sizlar qachongacha jazoni oshiraverasizlar?”, degan savolni o‘rtaga tashlashi mumkin.
Izoh (0)