Ukrainaga berilgan F-16 qiruvchi samolyotlari Amerikada ishlab chiqarilgan raketalar bilan jihozlanadi, deb yozadi The Wall Street Journal (WSJ) manbalarga tayanib.
Nashr maʼlumotlariga ko‘ra, F-16 ni AGM-88 HARM “havo-yer” raketalari va AMRAAM o‘rta masofaga mo‘ljallangan “havo-havo” raketalari hamda AIM-9X qisqa masofali raketalari bilan jihozlash rejalashtirilgan.
F-16 uchun raketalarni yetkazib berish doirasida Qo‘shma Shtatlar uzoq masofaga zarba yo‘llashga mo‘ljallangan qurilmalar uchun ham o‘q-dorilarni topshirishni rejalashtirmoqda.
“Biz bularning barchasini hech bo‘lmaganda ularga kerak bo‘lgan muhim hajmlarda yetkazib bera olishimizga ishonchimiz komil”, dedi ismini oshkor etmagan AQSH rasmiysi WSJ’ga.
Nashr manbasining qayd etishicha, ko‘plab Yevropa davlatlari o‘z zaxiralaridan Ukrainaga katta hajmdagi o‘q-dorilarni jo‘natishni istamagan. Shu sababli AQSH Mudofaa vazirligi Yevropa davlatlari o‘z moliyaviy mablag‘larini birlashtirib, Ukraina uchun qurollarni sotib olishlari mumkin bo‘lgan reja ishlab chiqdi.
Oldindan e’lon qilingan rejalarga ko‘ra, Daniya, Niderlandiya, Norvegiya va Belgiya Ukraina uchun F-16 samolyotlarini beradi. Umuman olganda, Ukraina qurolli kuchlari 80 ga yaqin qiruvchilarni qabul qiladi, yetkazib berishning bir qismi yil oxirigacha amalga oshiriladi. 10-iyul kuni AQSH davlat kotibi Entoni Blinken Daniya va Niderlandiya allaqachon F-16 samolyotlarini yetkazib berishni boshlaganini aytgandi.
Izoh (0)