AQSH senatorlari Marko Rubio va Uilyam Xeygerti, shuningdek, AQSh milliy razvedkasi sobiq direktori vazifasini bajaruvchi Richard Grenell Donald Trampning bo‘lajak ma’muriyatida davlat kotibi lavozimiga nomzod bo‘lib turibdi. Bu haqda Politico gazetasi o‘z manbasiga tayanib yozmoqda.
“Senatorlar Rubio va Xeygerti, shuningdek, Grenel davlat kotibi lavozimiga nomzodlar, senator Tom Koton esa mudofaa vaziri bo‘lishi mumkin”, deb yozadi nashr.
Hozirda AQSH davlat kotibi lavozimida Entoni Blinken faoliyat yuritmoqda. U 2021-yil 26-yanvarda mazkur lavozimni egallagan.
5-noyabr kuni bo‘lib o‘tgan AQSH prezidentligi uchun saylovda Donald Tramp raqibi Kamala Xarris ustidan g‘alaba qozondi.
“Men Amerika xalqiga minnatdorchiligimni bildirmoqchiman. Sizlar tomondan qirq yettinchi va qirq beshinchi prezident etib saylanganim favqulodda sharafdir”, dedi Tramp tarafdorlari bilan uchrashuvda.
Shuningdek, u dunyodagi urushlarni to‘xtatmoqchi ekanini ta’kidladi.
“To‘rt yil davomida biz ISHIDga qarshi g‘alabamizdan tashqari hech qanday urushni ko‘rmadik. Biz ISHIDni rekord muddatda tor-mor etdik, ammo boshqa hech qanday urush olib bormadik. Men urush boshlamoqchi emasman, aksincha, ularni to‘xtatmoqchiman”, dedi Tramp.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)