NATO alyansi Ukrainaga F-16 qiruvchi samolyotlarining birinchi partiyasini topshiradi. Bu haqda AQSH davlat kotibi Entoni Blinken bergan maʼlumotga asoslanib, Reuters nashri xabar berdi.
Manbada aytilishicha, F-16 samolyotlari hozirda Daniya va Niderlandiyadan Ukrainaga olib kelinmoqda. Tez orada Kiyevda NATO vakili ishtirokida texnikalarni topshirish tadbiri o‘tkaziladi.
Blinken Vashingtondagi NATO sammiti doirasida so‘zlagan nutqida yaqin bir necha kun ichida Ukraina uchun mustahkam paket taqdim etilishini aytgan. F-16 larning berilishi Ukrainaning NATOga aʼzoligi uchun aniq va mustahkam ko‘prik qurishi xabar qilingan.
“Bu samolyotlar Ukraina Rossiya agressiyasidan o‘zini samarali himoya qilishda davom etishiga ishonch hosil qilish uchun shu yozning o‘zida Ukraina osmonida parvoz qila boshlaydi”, — deyiladi AQSH davlat kotibi bayonotida.
F-16 samolyotlari ulkan hujum salohiyati tufayli uzoq vaqtdan beri Ukraina hukumatining diqqat markazida bo‘lgan. Qiruvchi samolyot 20 millimetrli to‘p bilan jihozlangan bo‘lib, bomba, raketa va snaryadlarni olib yura oladi.
“Biz Ukraina osmonida zamonaviy qiruvchi samolyotlarni kutib olishga tayyorlanyapmiz”, — degan Ukraina mudofaa vaziri Rustem Umerov niderlandiyalik va daniyalik hamkasblari bilan uchrashuvdan so‘ng X ijtimoiy tarmog‘ida.
Kelishuvga ko‘ra, Daniya jami 19 ta, Niderlandiya esa 24 ta F-16 samolyoti yetkazib berishga vaʼda bergan edi. Ikkala davlat ham Ukrainani F-16 samolyotlari bilan taʼminlash bo‘yicha xalqaro koalitsiyani harakatga keltirgan.
NATO aʼzolari, shuningdek, Ukrainaga yordam berish uchun qo‘shimcha beshta Patriot va boshqa strategik havo mudofaa tizimini yetkazib berishini eʼlon qilgan. Sharqiy frontda vaziyat o‘zgarishiga qarab harbiy uzatmalar ko‘payishi mumkinligi bildirilgan.
Izoh (0)