AQSH davlat kotibi Entoni Blinken Isroil strategik ishlar vaziri Ron Dermer bilan G‘azodagi gumanitar vaziyatni muhokama qildi, deya xabar beradi AQSH Davlat departamenti.
“Blinken G‘azodagi og‘ir gumanitar vaziyatni muhokama qildi, vaziyatni yaxshilash bo‘yicha ko‘rilgan choralar bilan tanishdi va tinch aholiga yordamni oshirishga chaqirdi”, deyiladi Davlat departamenti bayonotida.
AQSH davlat kotibi va Isroil vaziri, shuningdek, mintaqadagi keskinlikni pasaytirish uchun zarur qadamlarni muhokama qildi.
“Davlat kotibi G‘azodagi urushni to‘xtatish va barcha garovga olinganlarni uylariga qaytarish, shuningdek, urushdan keyin ko‘riladigan choralarni aniqlash muhimligini taʼkidladi”, deyiladi TIV xabarida.
Har ikki amaldor “Livanda diplomatik yechimga erishish uchun davom etayotgan sa’y-harakatlar” mavzusiga ham to‘xtaldi.
Blinken Erondan kelayotgan tahdidlar fonida AQSHning Isroil xavfsizligi bo‘yicha zaruriy choralar ko‘rishga tayyorligini yana bir bor ta’kidladi.
13-oktyabr kuni Entoni Blinken va Pentagon rahbari Lloyd Ostin Isroil hukumatiga maktub yo‘llab, unda Isroil Amerika qurollarini olishda davom etishni istasa, G‘azo sektoridagi gumanitar vaziyatni bir oy ichida yaxshilashi zarurligini talab qilgandi.
Izoh (0)