Vashington Ukraina prezidenti Vladimir Zelenskiyning Rossiya bilan mojaroni hal qilish rejasi bilan tanishib chiqdi. Bu haqda AQSHning BMTdagi doimiy vakili Linda Tomas-Grinfild xabar berdi.

Vakilning so‘zlariga ko‘ra, AQSH mazkur rejani targ‘ib qilmoqchi.

“Biz prezident Zelenskiyning “Tinchlik rejasi”ni ko‘rdik. Bizning fikrimizcha, u ishlay oladigan strategiya va rejani ishlab chiqadi. Biz Nyu Yorkda bo‘ladigan davlat rahbarlari bilan muloqot qilib, uni qanday qilib oldinga siljitishimiz mumkinligiga aniqlik kiritishimiz kerak”, dedi Tomas-Grinfild matbuot anjumanida.

Davlat departamenti avvalroq davlat kotibi Entoni Blinken o‘tgan hafta Kiyevga borganida Ukrainaning “Tinchlik rejasi”ni ko‘rib chiqqani haqida xabar bergan edi. Vashington uning mazmunini oshkor qilmagan.

Reuters’ning ma’lum qilishicha, Ukraina prezidenti Vladimir Zelenskiy rejani kelasi hafta Nyu Yorkda bo‘lib o‘tadigan BMT Bosh assambleyasi sessiyasida taqdim etish niyatida.

Ukrainaning g‘alaba rejasi

Reja to‘rtta asosiy va bitta qo‘shimcha bandni o‘z ichiga oladi. Zelenskiy g‘alaba Ukraina uchun “juda kuchli diplomatiyaga tayyor” bo‘lishni anglatishi, shu sababli mazkur reja tayyorlanganini aytgan.

“Ularning to‘rttasi asosiy, qo‘shimcha bittasi esa bizga urushdan keyin kerak bo‘ladi. Men ularni prezident Bayden bilan bo‘lishaman. Gap Ukrainaning xavfsizligi, geosiyosiy o‘rni, Ukrainani juda kuchli harbiy qo‘llab-quvvatlash haqida ketmoqda. Shuningdek, biz u yoki bu ishni qanday amalga oshirishni erkin hal qilishimiz kerakligi to‘g‘risida ham”, deydi siyosatchi.