Prezidentning “O‘zbekiston Milliy simfonik orkestri faoliyatini qo‘llab-quvvatlash hamda milliy va jahon mumtoz musiqa sanʼatidan aholini yanada kengroq bahramand etish chora-tadbirlari to‘g‘risida”gi qarori qabul qilindi. Bu haqda Adliya vazirligi xabar berdi.
O‘zbekiston davlat filarmoniyasi O‘zbekiston Milliy simfonik orkestri xodimlarining mehnatga haq to‘lashning eng kam miqdoriga nisbatan hisoblanadigan bazaviy lavozim maoshlari miqdorlari 2025-yil 1-yanvardan boshlab, orkestrning:
- badiiy-rahbar xodimlari uchun – 4 koeffitsiyentga;
- oliy va birinchi toifali artistlari uchun – 1,17 koeffitsiyentdan 4 koeffitsiyentga;
- ikkinchi toifali va toifasiz artistlari uchun – 1,17 koeffitsiyentdan 3 koeffitsiyentga oshirilgan holda belgilandi.
Davlat organlari, muassasalari va korxonalari o‘z xodimlarini milliy va jahon mumtoz musiqa sanʼati asarlari bilan tanishtirishi uchun chiptalar va abonementlar sotib olish amaliyoti yo‘lga qo‘yiladi.
Tajribali dirijyorlar va orkestr ijrochilarining mahorat maktablari faoliyatini yo‘lga qo‘yiladi.
Avvalroq, O‘zbekistonda davlat madaniyat muassasalari va tashkilotlari xodimlarining ish haqi 2025-yilda ikki marta oshirilishi haqida xabar berilgandi.
Shavkat Mirziyoyev 2023-yil 22-dekabr kuni Respublika Ma’naviyat va ma’rifat kengashining yig‘ilishida madaniyat va san’at, kutubxona va muzeylar sohasida ishlayotgan xodimlar oyliklari oshirilishini aytgandi. Madaniyat va san’at, kutubxona va muzeylar sohasida faoliyat olib borayotgan xodimlarning oyliklari 2024-yil 1-apreldan 20 foizga, 2025-yil 1-yanvardan yana 15 foizgacha bo‘lgan miqdorda oshirilishi ma’lum qilingandi.
2024-yil 3-yanvardan boshlab “Davlat madaniyat muassasalari va davlat arxivlari xodimlari mehnatiga haq to‘lash va ularni moddiy rag‘batlantirishning takomillashtirilgan tizimini tasdiqlash haqida” 2018-yil 19-iyundagi qaroriga o‘zgarish kiritish to‘g‘risidagi hukumat qarori kuchga kirdi.
Prezident 2024-yil 22-noyabr kuni madaniyat va san’at sohasini rivojlantirish, xususan, teatrlarning jamiyat madaniy hayotidagi ahamiyatini oshirish va ular faoliyatini yanada qo‘llab-quvvatlashga oid takliflar taqdimoti bilan tanishdi. Taqdimotda soha vakillarini rag‘batlantirish masalalariga ham alohida e’tibor qaratildi.
Izoh (0)