Президентнинг “Ўзбекистон Миллий симфоник оркестри фаолиятини қўллаб-қувватлаш ҳамда миллий ва жаҳон мумтоз мусиқа санъатидан аҳолини янада кенгроқ баҳраманд этиш чора-тадбирлари тўғрисида”ги қарори қабул қилинди. Бу ҳақда Адлия вазирлиги хабар берди.
Ўзбекистон давлат филармонияси Ўзбекистон Миллий симфоник оркестри ходимларининг меҳнатга ҳақ тўлашнинг энг кам миқдорига нисбатан ҳисобланадиган базавий лавозим маошлари миқдорлари 2025 йил 1 январдан бошлаб, оркестрнинг:
- бадиий-раҳбар ходимлари учун – 4 коэффициентга;
- олий ва биринчи тоифали артистлари учун – 1,17 коэффициентдан 4 коэффициентга;
- иккинчи тоифали ва тоифасиз артистлари учун – 1,17 коэффициентдан 3 коэффициентга оширилган ҳолда белгиланди.
Давлат органлари, муассасалари ва корхоналари ўз ходимларини миллий ва жаҳон мумтоз мусиқа санъати асарлари билан таништириши учун чипталар ва абонементлар сотиб олиш амалиёти йўлга қўйилади.
Тажрибали дирижёрлар ва оркестр ижрочиларининг маҳорат мактаблари фаолиятини йўлга қўйилади.
Аввалроқ, Ўзбекистонда давлат маданият муассасалари ва ташкилотлари ходимларининг иш ҳақи 2025 йилда икки марта оширилиши ҳақида хабар берилганди.
Шавкат Мирзиёев 2023 йил 22 декабрь куни Республика Маънавият ва маърифат кенгашининг йиғилишида маданият ва санъат, кутубхона ва музейлар соҳасида ишлаётган ходимлар ойликлари оширилишини айтганди. Маданият ва санъат, кутубхона ва музейлар соҳасида фаолият олиб бораётган ходимларнинг ойликлари 2024 йил 1 апрелдан 20 фоизга, 2025 йил 1 январдан яна 15 фоизгача бўлган миқдорда оширилиши маълум қилинганди.
2024 йил 3 январдан бошлаб “Давлат маданият муассасалари ва давлат архивлари ходимлари меҳнатига ҳақ тўлаш ва уларни моддий рағбатлантиришнинг такомиллаштирилган тизимини тасдиқлаш ҳақида” 2018 йил 19 июндаги қарорига ўзгариш киритиш тўғрисидаги ҳукумат қарори кучга кирди.
Президент 2024 йил 22 ноябрь куни маданият ва санъат соҳасини ривожлантириш, хусусан, театрларнинг жамият маданий ҳаётидаги аҳамиятини ошириш ва улар фаолиятини янада қўллаб-қувватлашга оид таклифлар тақдимоти билан танишди. Тақдимотда соҳа вакилларини рағбатлантириш масалаларига ҳам алоҳида эътибор қаратилди.
Изоҳ (0)