O‘zbekistonda madaniyat va san’at, kutubxona va muzeylar sohasida ishlayotgan xodimlar oyliklari oshiriladi. Bu haqda Shavkat Mirziyoyev 22-dekabr kuni Respublika Ma’naviyat va ma’rifat kengashining yig‘ilishida aytib o‘tdi.
Yig‘ilishda mutasaddilarga musiqa va san’at maktablari muallimlarining oyligini oshirish, ushbu maktablarning kommunal xarajatlarini budjetdan qoplash bo‘yicha chora-tadbirlar ishlab chiqish topshirildi.
“Umuman olganda, madaniyat va san’at, kutubxona va muzeylar sohasida faoliyat olib borayotgan xodimlarning oyliklari 2024-yil 1-apreldan 20 foizga, 2025-yil 1-yanvardan yana 15 foizgacha bo‘lgan miqdorda oshiriladi”, — deb yozmoqda prezident matbuot kotibi.
Davlat rahbari madaniyat va san’at sohasida ta’lim sifatini oshirish bo‘yicha jiddiy o‘zgarish qilish shartligini ta’kidlagan.
Shuningdek, nashriyot va matbaa korxonalarining moliyaviy imkoniyatlari kengaytirilishi, moddiy-texnik bazasi mustahkamlanishi zarurligi qayd etilgan. Shu maqsadda ushbu korxonalar 5 yilga soliqlardan ozod qilinadi. Shuningdek, ularga imtiyozli kreditlar ajratiladi.
Prezident tarjimonlikdek mas’uliyatli mehnatni munosib rag‘batlantirish uchun ulug‘ shoir va tarjimon Ogahiy nomidagi xalqaro mukofotni ta’sis etishni taklif etdi.
Hududlardagi bolalar kutubxonalari bosqichma-bosqich bolajonlarning sevimli maskaniga aylantiriladi.
Izoh (0)