Apple va Synchron kompaniyalari neyroimplantli falajlangan erkakning iPad planshetini fikr kuchi bilan boshqarayotganini ko‘rsatuvchi videoni taqdim etdi. Bu haqda PC Mag nashri xabar bermoqda.
Bu Apple kompaniyasining 2025-yil mayda e’lon qilingan yangi texnologiyasi tufayli amalga oshgan. Mazkur texnologiya “miya-kompyuter” (BCI) interfeyslarini Bluetooth orqali o‘z mahsulotlariga to‘g‘ridan-to‘g‘ri ulash imkonini beradi.
Videoda yon amiotrofik skleroz bilan og‘rigan Mark Jekson Synchron Stentrode implanti yordamida qo‘llari, ovozi yoki nigohisiz menyu bo‘ylab harakatlanadi, ilovalarni ochadi va matn teradi. Jeksonning aytishicha, qo‘llaridan foydalana olmaydigan bo‘lgach, o‘zini mustaqillikdan mahrum bo‘lgandek his qilgan. Texnologiya unga yaqinlari bilan yana muloqot qilish, yangiliklarni o‘qish va dunyo bilan aloqani his etish imkonini bergan, oldingi hayotining bir qismini qaytargan.
Apple’ning asosiy yangiligi operatsion tizim darajasida BCI-qurilmalarni universal qo‘llab-quvvatlashdan iborat. Endi iPad yoki Mac neyrointerfeyslarni xuddi standart klaviatura yoki sichqoncha kabi taniydi. Ilgari Apple mahsulotlariga ulanish uchun implant ishlab chiqaruvchilardan nostandart yechimlar talab etilardi.
Namoyishning muhim elementi real vaqt rejimida ekranda miya signallarini tanib olish darajasini ko‘rsatadigan yangi vizual indikator bo‘ldi. Ilova belgisi atrofidagi ko‘k ramka signal kuchayishi bilan to‘ldiriladi, bu foydalanuvchiga tizim uning niyatlarini qanchalik yaxshi o‘qiyotganini ko‘rsatadi.
Synchron bosh operatsion direktori Kurt Haggstromning fikricha, bu qayta aloqa juda muhim: u foydalanuvchiga yanada samarali o‘zaro ta’sir uchun diqqatini jamlashni moslashtirish imkonini beradi.
Synchron kompaniyasining Stentrode implantati miyaga qon tomiri orqali kiritilishi bilan ajralib turadi, bu esa bosh suyagini teshish zaruratini bartaraf etadi. Hozirga qadar qurilma AQSH va Avstraliyadagi o‘n nafar bemorga o‘rnatilgan.
Izoh (0)