Zumwalt sinfiga mansub USS Michael Monsoor (DDG 1001) raketa esminetsining yangi suratlari ijtimoiy tarmoqlarda munozaralarni qo‘zg‘adi. Boisi uning korpusida korroziya va shikastlanish izlari ko‘zga tashlangan bo‘lib, bu radarlarda ko‘rinmasligi aytilgan zamonaviy kemaning real imkoniyatlari haqida savollarni paydo qildi.
AQSH harbiy-dengiz kuchlari o’zining eng ilg‘or deya maqtalgan va har biri 9 milliard dollardan tushgan esminetsi haqidagi tanqidlarga javob berishga majbur bo‘ldi. Tasvirlar kema Yokosuka bandargohiga kirgan vaqti yaponiyaliklar tomonidan olingan.
Ba’zi foydalanuvchilar DDG 1001 haqida kinoyali izoh yozib, u ilg‘or harbiy kemadan ko‘ra eski yodgorlikka o‘xshab qolganini ta’kidlagan. Boshqalar esa korpusdagi shikastlanishlar va korroziya esminetsning radarlarda ko‘rinmaslik, ya’ni “stels” xususiyatiga putur yetkazishi mumkinligidan xavotir bildirgan.
“Bu kema bilan jangga kirish uchun kishiga jasorat kerak bo‘ladi”, deb yozgan foydalanuvchilardan biri.
AQSH harbiy-dengiz kuchlari tarmoqlarda muhokamalarni keltirib chiqargan suratlar yuzasidan munosabat bildirib, xavotirlarni aritishga urindi. Rasmiylarning tushuntirishicha, kema korpusida kuzatilgan rang o‘zgarishi va korroziya uzoq muddatli dengiz amaliyotlarining natijasidir. Ular bunga sho‘r suv, ultrabinafsha nurlari, dengizni ifloslantiruvchi moddalarining ta’siri va kemani qirg‘oqqa bog‘lash uchun ishlatilgan metall tross kabilarni sabab sifatida keltirishdi.
“Bunday turdagi sirtqi yemirilish holatlari dengizning murakkab sharoitlarida doimiy harakatlanadigan yirik kemalar uchun odatiy holdir”, dedi AQSH harbiy-dengiz kuchlari vakili.
USS Michael Monsoor Zumwalt sinfiga oid uchta esminetsning ikkinchisidir. Dasturga binoan jami 32 ta kema qurilishi kerak edi. Biroq ularning har biri 9 milliard dollardan tushishi ma’lum bo‘lgach, loyiha yopildi. Boisi bu 1,3 milliard dollarlik dastlabki hisob-kitoblardan ancha ko‘p.
Avvaliga kema asosan quruqlikdagi qo‘shinlar, xususan dengiz piyodalarining qirg‘oq amaliyotlarida artilleriya ko‘magi berish uchun mo‘ljallangan edi. Bu uchun esminetsga bir juft 155 mm kalibrli Advanced Gun System (AGS) to‘plari o‘rnatildi. Biroq ushbu qurol uchun maxsus ishlab chiqarilishi kerak bo‘lgan snaryadlar narxi qariyb 1 million dollarga yaqinlashib qolgach, rejalar o‘zgardi.
Shundan so‘ng kemaga yangi vazifa yuklatilib, AGS to‘plari o‘rniga gipertovushli raketalar o‘rnatildi. Esminetsni qurishda ishlatilgan “tumblehome” korpusi sharofati bilan u mazkur vazifani dushman radarlariga ko‘rinmay bajara olishi aytiladi.
Biroq tanqidchilarning fikricha, Yokosuka bandargohida olingan suratlar “kutilma va natija”ning ramzidir. Tarafdorlar esa kema korpusi uning ichki samaradorligi va strategik ahamiyatiga ta’sir o‘tkaza olmaydi, deb hisoblamoqda.
Izoh (0)