Futbol bo‘yicha 2026-yilda o‘tkaziladigan Jahon chempionatining Osiyo mintaqasi 3-saralash bosqichi 6-tur doirasida O‘zbekiston milliy jamoasi safarda Shimoliy Koreya jamoasiga qarshi maydonga tushib qiyin uchrashuvda 0:1 hisobida g‘alaba qozondi.
Uchrashuvni faol boshlagan o‘zbekistonliklar birinchi bo‘limning so‘nggi daqiqalarida Abbosbek Fayzullayevning chiroyli zarbasi evaziga oldinga chiqib oldi.
Ikkinchi bo‘limda to‘liq himoyaga e’tibor qaratgan mehmonlar yakunda 10 kishi bo‘lib g‘alabani ushlab qolishga erishdi. 80-daqiqada Umar Eshmurodov to‘pni qo‘li bilan o‘ynadi. VAR’ni ko‘rgan hakam penalti belgilash bilan birga himoyachiga qizil kartochka ko‘rsatdi. O‘tkir Yusupovning qahramonligi evaziga Laosdagi uchrashuvda milliy jamoa darvozasi dahslizligi saqlanib qoldi.
Sofascore ushbu bahsda harakatlangan o‘yinchilar uchun baholarni e’lon qildi. Unga ko‘ra, O‘zbekiston terma jamoasining yagona goliga mualliflik qilgan Abbosbek Fayzullayev 7,8 ballga loyiq ko‘rilgan.
Penaltini qaytarib qahramonga aylangan O‘tkir Yusupovning o‘yini 7,7 ballga baholandi. Himoyachi Abduqodir Husanov va Odiljon Hamrobekovlarning o‘yini 7,4 ballga loyiq ko‘rildi.
O‘zbekiston terma jamoasi safida penaltiga sababchi bo‘lgan Umar Eshmurodov eng past 6,5 ball bilan baholandi. Zaxiradan maydonga tushgan Hojimat Erkinov va Azizbek Turg‘unboyev 6,6 ballga loyiq ko‘rilgan.
-p_HAMRs9.jpg)
Shimoliy Koreya tarkibida himoyachi Kim Yu Song eng yuqori 7,5 ball bilan jamoadoshlari orasida eng yaxshi ko‘rsatkichni qayd etdi. Chap qanot yarim himoyachisi Il Song Ri 6,1 ball bilan nafaqat koreyaliklar safida, balki o‘yinda eng yomon o‘yin ko‘rsatgan o‘yinchi sifatida qayd etildi.
Ma’lumot uchun, ushbu g‘alabadan so‘ng O‘zbekiston terma jamoasi o‘z ochkolari sonini 13 taga yetkazib oldi va A guruhida ikkinchi o‘rinni egallab turibdi. Terma jamoa 7-tur uchrashuvini kelasi yilning mart oyida o‘tkazadi. 20-mart kuni Toshkentda bo‘lib o‘tadigan uchrashuvda qo‘shni Qirg‘iziston raqiblik qiladi.
Izoh (0)