Rossiyada birinchi marta “KUB-M” mobil boshpanalarini ishlab chiqarish boshlandi. Ular Nijniy Novgorod viloyatining Dzerjinsk shahrida ishlab chiqarilmoqda. Bu haqda “Meduza” xabar berdi.
Boshpana odamlarni turli tahdidlardan, shu jumladan, tabiiy ofatlar va texnogen hodisalardan himoya qilishni ta’minlaydi. “KUB-M”ning asosiy to‘plami ikkita modulni o‘z ichiga oladi: 54 kishilik boshpana xonalari va texnik blok. Qo‘shimcha modullarni o‘rnatish orqali boshpana sig‘imini oshirish mumkin. “KUB-M” 48 soat davomida yadroviy portlash to‘lqini, nurlanish, radiatsiya, hududning radioaktiv ifloslanishi, oddiy qurollarning portlovchi va parchalanuvchi ta’siri, xavfli kimyoviy moddalar va yong‘inlardan himoyani ta‘minlaydi.
Bunday inshootlar bir qator afzalliklarga ega, masalan, ular ko‘chirilishi, cheklangan hududda o‘rnatilishi mumkin. 2023-yil boshida Rossiyada Sovet davrida qurilgan bombapanohlarni tekshirish va ta’mirlash ishlari boshlandi. Mamlakat hududida ko‘plab bunkerlar, yerto‘lalar va boshqa xavfsiz boshpanalar mavjud bo‘lib, ularning aksariyati o‘nlab yillar davomida konservatsiya qilingan. Bunday obyektlarning aksariyati yaroqsiz holatda edi.
Izoh (0)