Abxaziya prezidenti Aslan Bjaniya muxolifat bosimi ostida iste’foga chiqdi. Parlamentni egallab olgan muxolifat bilan kelishilgan holda hukumat rahbari ham lavozimidan ketadi.
“Mamlakatda barqarorlik va konstitutsiyaviy tartibni saqlash maqsadida, Abxaziya respublikasi konstitutsiyasining 63-moddasiga muvofiq, men Abxaziya prezidenti lavozimidan iste’foga chiqaman”, deyiladi Bjaniyaning parlament spikeri nomiga yo‘llagan xatida.
Davlat rahbari vazifasini bajaruvchi vitse-prezident Badra Gunba, bosh vazir vazifasini bajaruvchi esa ilgari ushbu lavozimni egallagan Valeriy Bganba bo‘ladi. Hukumat va muxolifat muzokaralarda tegishli kelishuvga erishgan. Namoyishchilar 19-noyabr kuni hukumat majmuasini tark etishi kerak. Aks holda Bjaniya iste’fosini qaytarib oladi.
Abxaziyadagi namoyishlari
Abxaziya poytaxtida tartibsizliklar bir hafta oldin boshlangan. 15-noyabr kuni Abxaziya parlamenti Rossiya bilan yangi investitsiya bitimini ko‘rib chiqishi kerak edi. Mahalliy aholining aksariyati Rossiya biznesining kengayishi ularning turizmdagi daromadidan mahrum qilishidan xavotirda.
16-noyabr kuni namoyish ishtirokchilari bayonot berdi. Ular hukumat binolarini egallash Abxaziyaning Rossiya bilan yaqin aloqalariga qarshi qaratilmaganini aytishdi. Ammo Bjaniyani “bu aloqalardan shaxsiy g‘arazli manfaatlari yo‘lida foydalanishga urinish va o‘z rejimini kuchaytirish uchun ularni manipulyatsiya qilishda” ayblashdi.
17-noyabr kuni agar Abxaziya prezidenti Aslan Bjaniya iste’foga chiqmasa, muxolifat muvaqqat hukumat tuzishini e’lon qildi.
Izoh (0)