Rossiya armiyasi 17-noyabr oqshomida Sumi shahrining aholi zich joylashgan mikrorayoniga raketa hujumi uyushtirdi. Otilgan raketalardan biri to‘qqiz qavatli turar joy binosiga kelib urilgan.
Ukraina Ichki ishlar vazirligining xabar berishicha, zarba natijasida 11 kishi, jumladan, ikki nafar bola halok bo‘lgan.
Sumi shahar kengashi maʼlumotlariga ko‘ra, 89 kishi, jumladan, 11 nafar bola jarohatlangan. 37 nafar yarador shifoxonalarda qolmoqda. Raketa hujumiga uchragan hududdan 400 ga yaqin aholi evakuatsiya qilingan.
Hammasi bo‘lib, o‘nta ko‘p qavatli uy va avtomobillarga zarar yetgan, deya xabar beradi Ukraina prokuraturasi.
Shahar meri vazifasini bajaruvchi Artyom Kobzar Rossiya qo‘shinlari Sumiga hujum qilish uchun ballistik raketalardan foydalanganini aytgan.
Sumi viloyatida bir kechada Rossiyadan jami o‘nta aviazarba qayd etilgan, kamida 26 ta portlash ovozi eshitilgan. Rossiya armiyasi turar joy binosiga zarba bergach, shaharning muhim infratuzilmasiga navbatdagi avizarba uyushtirgan. Hujum oqibatida Sumi elektr energiyasidan to‘liq uzilgan.
Qurbonlar xotirasiga Sumida 18 va 19-noyabr kunlari motam e’lon qilindi.
“Sumidagi to‘qqiz qavatli binoga raketa zarbasi berildi, barcha zarur xizmatlar hozirda amalga oshirilmoqda, ularning oilalari va yaqinlariga hamdardlik bildiraman”, deb yozdi Ukraina prezidenti Vladimir Zelenskiy Telegramdagi kanalida.
Rossiya armiyasi 19-sentyabr kuni Ukrainaning Sumi shahridagi 200 dan ortiq qariya yashaydigan pansionatga zarba bergan edi.
Hodisa oqibatida 13 kishi jarohatlangan, kamida bir kishi halok bo‘lgan, 147 kishi xavfsiz joyga ko‘chirilgan. Hujum vaqtida muassasada 221 nafar bemor bo‘lgan, ulardan 87 nafari to‘shakka mixlangan bemorlar hisoblangan.
Bundan tashqari, 60 nafar xizmat ko‘rsatuvchi xodim, ya’ni jami 300 ga yaqin kishi bo‘lgan. Ular tushlik qilayotganida, ayrimlari dam olayotganida pansionatga zarba berilgan.
Izoh (0)