Yevropa ittifoqi diplomatiyasi rahbari Josep Borrel KXDRning qit’alararo ballistik raketa uchirilishini “qat’iy qoralashi”ni va buni “noqonuniy” deb bilishini ma’lum qildi. Bu haqda Bryusselda e’lon qilingan bayonotda aytiladi.
Borrelning fikricha, “noqonuniy raketa uchirilishi KXDRning ommaviy qirg‘in qurollarini ishlab chiqishda davom etayotganidan dalolat beradi”. Uning fikricha, bu harakatlar BMT nizomini buzadi va “xalqaro va mintaqaviy tartibni xavf ostiga qo‘yadi”.
Borrelning so‘zlariga ko‘ra, Pxenyan “zudlik bilan o‘zining raketa va yadroviy dasturlarini” tark etishi va ularni “to‘liq va tekshirilishi mumkin bo‘lgan tarzda” yo‘q qilishi kerak.
Borrel 1-noyabr, juma kuni muzokaralar uchun Yaponiyaga rejalashtirilgan tashrif bilan keladi, bu yerda KXDR asosiy mavzulardan biriga aylanadi.
Avvalroq Yaponiya mudofaa vazirligi KXDR tomonidan uchirilgan raketa rekord darajada 86 daqiqa parvoz qilgani va shu vaqt ichida barcha davrlarning eng baland cho‘qqisiga, ya’ni 7 ming km dan ortiqroqqa ko‘tarilgani haqida xabar bergan edi.
Hozirda mamlakat rasmiylari ushbu raketa yangi turdagimi yoki yo‘qmi — tahlil qilishda davom etmoqda.
Koreya markaziy axborot agentligining xabar berishicha, Shimoliy Koreya yetakchisi Kim Chen In mamlakat o‘z yadroviy qurolli kuchlarini mustahkamlash yo‘nalishini o‘zgartirmasligini ta’kidlagan.
Izoh (0)