Yevropa Ittifoqi Ukrainaga harbiy yuk yetkazib berishga 42 milliard yevro sarflagan, yordamning umumiy hajmi esa 110 milliard yevroga yetgan.
Bu haqda Yevropa Ittifoqi diplomatik xizmati rahbari Josep Borrel Bryusseldagi anjumanda so‘zlagan nutqida ma’lum qildi.
“Hozirgi kunga qadar biz Ukrainaga faqat harbiy ehtiyojlar uchun 42 milliard yevro yubordik, yil oxiriga kelib iqtisodiy va moliyaviy yordamni hisoblasak, u allaqachon 110 milliard yevroga yetadi. Bu ko‘rsatkich AQSH taqdim qilgan yordamdam ko‘ra ko'proq”, dedi Borrel.
Avvalroq Jozep Borrel G‘arbning harbiy va iqtisodiy yordami bo‘lmasa, Ukrainadagi urush ikki hafta ichida tugashini aytib o‘tgandi.
“Ko‘pchilik bu mojaroning tezroq tugashini xohlaydi. Agar biz Ukrainani qo‘llab-quvvatlashni to‘xtatsak, 15 kundan so‘ng urush tugaydi va Putin o‘z maqsadlariga erishadi. Biroq biz ukrainlar uchun shunday bo‘lishini xohlaymizmi?”, degandi Borrel.
Yevropa diplomatiyasining rahbari bunday ssenariy Yevropa ittifoqi uchun mutlaqo maqbul emasligini ta’kidladi. U Ukrainadagi mojaroning yevropaliklar xavfsizligiga ham aloqasi borligini aytdi.
Izoh (0)