Ukrainani tiklash bo‘yicha konferensiya ishtirokchilari mamlakatni urushdan keyin qayta tiklash uchun Kiyevga qo‘shimcha 60 milliard dollar yuborishga va’da berdi. Bu haqda Londondagi konferensiyaning yakuniy hujjatiga tayanib, Meduza yozmoqda.
Xabarga ko‘ra, bu summaga Yevropa Ittifoqi jamg‘armasidan 50 milliard yevro (54,8 milliard dollar), AQSH va’da qilgan 1,3 milliard dollar va Buyuk Britaniyaning uch milliard dollarlik kredit kafolati kiradi.
Shveysariya 1,5 milliard frank (1,68 milliard dollar) miqdoridagi qo‘shimcha yordamni e’lon qildi. Ushbu mablag‘lar 2027-yilgacha taqdim etiladi. O‘z navbatida, Fransiya 2023-yilda Ukrainaga yana 40 million yevro (43,8 million dollar) ajratishini ma’lum qilgan.
Bundan tashqari, 42 mamlakatdan 500 ga yaqin kompaniya Ukrainaning tiklanishini qo‘llab-quvvatlashga va’da berdi.
“Butun dunyo kompaniyalari Ukrainaning ustuvor tarmoqlarda, xususan, energetika, texnologiya, infratuzilma va moliya sohasida ulkan salohiyatini ro‘yobga chiqarishga yordam berish, shuningdek, Ukrainada xususiy sektorni rivojlantirishda o‘z tajribasini qo‘llash uchun hamkorlik qilishga kelishib oldi”, — deyiladi bayonotda.
Jahon banki maʼlumotlariga ko‘ra, Ukrainani urushdan keyin qayta qurish uchun kamida 411 milliard dollar kerak bo‘ladi. 2022-yilning noyabrida Ukraina prezidenti Vladimir Zelenskiy mamlakatni tiklash uchun trillion dollardan ortiq mablag‘ zarurligini aytgandi.
21–22-iyun kunlari Londonda Ukrainani tiklash bo‘yicha navbatdagi konferensiya bo‘lib o‘tdi. Tadbir Ukrainadagi islohotlarga bag‘ishlangan va 2017-yildan buyon o‘tkazib kelinayotgan yillik konferensiyalarning davomi hisoblanadi.
Izoh (0)