Ukraina 2023-yil boshidan buyon xorijiy hamkorlardan 17 milliard dollarga yaqin moliyaviy yordam oldi. Mazkur maʼlumot mamlakat Moliya vazirligi tomonidan eʼlon qilindi.
Joriy yilning besh oyidan kamroq vaqt ichida Ukraina davlat budjetini moliyalashtirishning umumiy hajmi 841,6 milliard grivna yoki 23 milliard dollarni tashkil qilgan. Ularning 6,1 milliard dollari davlat ichki obligatsiyalarini joylashtirish orqali olingan.
O‘z navbatida, xorijiy hamkorlar yil boshidan buyon Ukrainaga 16,9 mlrd dollar ajratgan. Xususan, Yevropa Ittifoqi 6,5 milliard dollar, AQSH 4,75 milliard dollar, Xalqaro Valyuta Jamg‘armasi 2,7 milliard dollar, Kanada 1,75 milliard dollar ajratgan.
Bundan tashqari, Jahon banki 505 million dollar, Buyuk Britaniya 498 million dollar, Germaniya 52 million dollar, Ispaniya 50 million dollar bergan.
Ma’lumot o‘rnida, Ukrainaga jangovar harakatlar oqibatida yetgan zarar 700 milliard dollarni tashkil etadi, bu summa mamlakat infratuzilmasiga hujumlar oqibatida ikki karra o‘sgan.
Yaqin orada Ukrainani Rossiya banklaridan musodara qilingan mablag‘lar hisobidan qayta tiklashni boshlash rejalashtirilmoqda, buning uchun maxsus hisobda 17 milliard grivna (462,5 million dollar) turibdi.
Izoh (0)