Janubiy Koreya prezidenti Yun Sok Yol Shimoliy Koreyadan kelgan dronlarning har biriga KXDR bilan chegara orqali ikki yoki uchta uchuvchisiz uchoq yuborish bilan javob qaytarishni buyurdi. Bu haqda Janubiy Koreyaning yuqori martabali mulozimiga tayanib, Yonhap xabar bermoqda.
“Birinchi dron kelganida, prezident bizda ham dron borligini aytib, shimolga qarshi zudlik bilan tegishli choralar ko‘rishni buyurdi. U Shimoliy Koreyadan kelgan bittaga javoban ikki-uchta dron yuborishni buyurdi”, — dedi rasmiy va buyruqqa binoan, kerak bo‘lsa, dronlarni urib tushirish kerakligini ta’kidladi.
26-dekabr kuni Kengido provinsiyasining chegara hududida KXDRning beshta droni aniqlangan, shundan keyin Janubiy Koreya ogohlantiruvchi xabarlar tarqatgan, qiruvchilar, vertolyotlar va havo hujumiga qarshi mudofaa vositalari trevoga bo‘yicha havoga ko‘tarildi. Respublika o‘z uchuvchisiz uchar qurilmalarini chegara yaqinidagi tumanlarga yo‘naltirdi.
Janubiy Koreya harbiylari KXDR dronlarini urib tushirish uchun qariyb yuz marta o‘t ochdi. Eni 2 metrdan ortiq bo‘lmagan dronlarni bunday o‘qlar bilan urib tushira olishmagan. Beshta drondan bittasi Seul osmonidan uchib o‘tgan, qolganlari Janubiy Koreya g‘arbidagi Kanxvado oroli yaqiniga borgan. U demarkatsiya chizig‘i yaqinida, Seul esa undan taxminan 50 km narida joylashgan. Keyinroq uchar qurilmalar Janubiy Koreya harbiylari monitoring zonasidan g‘oyib bo‘lgan.
Shundan so‘ng Janubiy Koreya harbiylari Shimoliy Koreya dronlarini yo‘q qilish bo‘yicha operatsiya muvaffaqiyatsiz o‘tgani uchun omma oldida uzr so‘radi.
Izoh (0)