Janubiy Koreya Mudofaa vazirligi Shimoliy Koreyadan kelgan dronlarni qaytarish bo‘yicha muvaffaqiyatsiz operatsiyadan so‘ng Isroil tomonidan ishlab chiqilgan Sky Spotter tizimini sotib olish imkoniyatini ko‘rib chiqmoqda. Bu haqda Yonhap agentligi harbiy vazirlikdagi manbaga tayanib, xabar berdi.
Agentlik ma’lumotlariga ko‘ra, yaqin bir necha hafta ichida harbiylar Sky Spotter’ning KXDR dronlarini aniqlash samaradorligi va uning Janubiy Koreyada ishlatiladigan radarlar va boshqa kuzatuv tizimlariga qanchalik mos kelishini o‘rganmoqchi. Ushbu o‘rganish natijasida tizimlarni sotib olish uchun Isroilga rasmiy so‘rov berish-bermaslik to‘g‘risida qaror qabul qilinadi.
Isroilning Rafael Advanced Defense Systems kompaniyasi tomonidan ishlab chiqilgan Sky Spotter tizimi havo nishonlarini (jumladan, past uchuvchi samolyotlar va dronlarni) 1 kilometrdan bir necha o‘nlab km masofagacha aniqlash uchun mo‘ljallangan.
2022-yil 26-dekabr kuni KXDRdan beshta dron uchib kelib, Janubiy Koreya bilan chegara chizig‘ini kesib o‘tgan va ulardan biri hatto Janubiy Koreya prezidenti Yun Sok Yolning ofisi yaqinidagi parvozlar taqiqlangan hududga ham kirib borgan. Janubiy Koreya harbiylari 100 marta o‘t ochishiga qaramay dronlarni urib tushira olmagan. Keyinroq harbiylar muvaffaqiyatsizlik uchun ommadan uzr so‘rab chiqdi.
Izoh (0)