KXDRda Koreya Mehnat partiyasi Markaziy qo‘mitasi kotibi, KMP Markaziy harbiy qo‘mitasi raisi o‘rinbosari Pak Chon Chxonni o‘z lavozimidan ozod etdi. Bu haqda Koreya Markaziy telegraf agentligi xabar berdi. U mamlakatda nufuzi jihatidan ikkinchi o‘rinda turadigan harbiy mansabdor hisoblanardi (KXDR yetakchisi, oliy bosh qo‘mondon Kim Chen Indan keyingi).
Bu lavozimga shu paytga qadar KXDR mudofaa vaziri bo‘lib kelgan Li Yon Gil tayinlandi. Mansabdorlar lavozimlarining o‘zgartirilishi sabablariga Shimoliy Koreya davlat agentligi aniqlik kiritmadi.
Reuters qayd etishicha, Pxenyan muntazam ravishda harbiy va siyosiy rahbariyatni almashtirib keladi, partiya majlislarida esa tez-tez muhim siyosiy qarorlar haqida e’lon qilib turadi.
Pak Kim Chen Inning milliy yadroviy kuchlar potensialini mustahkamlash niyati haqidagi bayonotlari fonida ishdan olindi. Yadroviy kuchlarning asosiy vazifasi, tiyib turish va “tinchlikni himoya qilish” muvaffaqiyatsizlikka uchragan taqdirda, “mudofaa emas, boshqacha ko‘rinishga ega bo‘ladi”, dedi u.
Seuldagi Koreya milliy birlashuv instituti xodimi O Gyon Supning fikricha, mansabdorning iste’foga chiqarilishi yaqinda KXDR dronlari chegarani buzib o‘tgani tufayli Shimol va Janub o‘rtasidagi munosabatlar keskinlashuvi bilan bog‘liqdir.
Agentlikning Seuldagi manbalariga ko‘ra, bunga javoban Janubiy Koreya chegara orqali uchta dron yuborgan, ammo Shimol bunga munosabat bildirmagan. O Gyon Sup taxmin qilishicha, KXDR harbiylari dronlarni topa olmagan. “Pak xavfsizlikni ta’minlash bo‘yicha operatsiya muvaffaqiyatsizlikka uchragani uchun mas’uliyatni o‘z zimmasiga olgan bo‘lishi mumkin”, — dedi u.
Izoh (0)