O‘z hududida urib tushirilgan Janubiy Koreyaga tegishli dron topilganini da’vo qilgandan so‘ng, Shimoliy Koreya Seulni “jiddiy harbiy provokatsiya”da aybladi.
“KXDR Mudofaa vazirligi vakili keyingi safar mamlakat hududini harbiy yo‘l bilan buzish “urush e’lon qilish” sifatida baholanishi va “zudlik bilan javob zarbasi”ga olib kelishi bilan tahdid qildi”, deyiladi Koreya markaziy telegraf agentligi xabarida.
Shimoliy Koreya rasmiylariga ko‘ra, 13-oktyabr kuni Pxenyanda halokatga uchragan Janubiy Koreya harbiy droni bo‘laklari topilgan. Maxsus tuzilgan tergov guruhi Pxenyan markaziga varaqalar tarqatgan aynan mana shu dron bo‘lgan, deb taxmin qilmoqda, ammo yakuniy xulosa hali chiqarilmagan.
Pxenyan maʼlumotlariga ko‘ra, oktyabr oyida Janubiy Koreyadan targ‘ibot varaqalaridan iborat dronlar mamlakat poytaxtiga uch marta yaqinlashgan. Janubiy Koreya mudofaa vaziri Kim Yon Xyon ushbu ma’lumotni “tasdiqlay olmasligini” aytgan.
Koreya yarimorolidagi keskinlik oxirgi paytlarda sezilarli darajada oshib bormoqda. 15-oktyabr kuni Shimoliy Koreya bir paytlar Koreyalararo hamkorlik ramzi hisoblangan Janubiy Koreyaga olib boruvchi yo‘llarni portlatib yuborgan edi.
Seul ma’lumotlariga ko‘ra, Shimoliy Koreya 2024-yil boshidan buyon chegarada tankka qarshi yangi to‘siqlar qurib, minalar o‘rnatmoqda.
Keyinroq Pxenyan mamlakatning yangi konstitutsiyasi Janubiy Koreyani rasman “dushman davlat” sifatida belgilashini tasdiqlagan. Shuningdek, Shimoliy Koreya Janubiy Koreya bilan birlashish g‘oyasidan rasman voz kechgan.
Izoh (0)