“Vazirlar Mahkamasining Notariuslar tomonidan ayrim notarial harakatlarni amalga oshirish tartibi to‘g‘risidagi maʼmuriy reglamentlarni tasdiqlash haqida” qaroriga o‘zgartirish va qo‘shimchalar kiritish to‘g‘risidagi hukumat qarori qabul qilindi.
Notarial harakatlarni amalga oshirishda notariuslar tomonidan “Notarius” avtomatlashtirilgan axborot tizimi orqali elektron shaklda olingan malumotlarni chop etish va hujjatlar yig‘majildiga tikish talabi bekor qilinmoqda. Ushbu maʼlumotlar endilikda tizimda saqlanadi.
Shu kunga qadar notariuslar quyidagi hujjatlarni chop etib yig‘majildga tikishga majbur bo‘lishgan:
- yuridik shaxsning taʼsis hujjatlari va davlat ro‘yxatidan o‘tganligi haqida guvohnoma;
- to‘lov amalga oshirilganligi haqida invoys;
- jismoniy shaxsga vakillik qilish uchun ishonchnoma bergan shaxsning o‘lim haqida dalolatnoma yozuvi qayd etilmaganligi to‘g‘risida maʼlumotnoma;
- mulkni boshqa shaxsga o‘tkazish taqiqlanmaganligi yoki xatlanmaganligi haqidagi maʼlumotnoma va boshqalar.
2024-yil 1-yanvardan boshlab ko‘p kvartirali uylardagi ko‘chmas mulkni boshqa shaxsga o‘tkazish bilan bog‘liq bitimlarni tasdiqlashda notariuslar mulkdorning majburiy badallar yoki to‘lovlar bo‘yicha qarzdorligi mavjud emasligini Qurilish va uy-joy kommunal xo‘jaligi vazirligining axborot tizimi orqali tekshirishadi.
Hujjat qonun hujjatlari maʼlumotlari milliy bazasida eʼlon qilingan va 2023-yil 13-dekabrdan kuchga kirdi.
Bundan oldin O‘zbekistonda mol-mulk bilan bog‘liq ayrim bitimlarni videokonferensaloqa orqali rasmiylashtirishga ruxsat berilishi, notariuslar tomonidan undiriladigan to‘lovlarning miqdori o‘zgartirilshi ma’lum bo‘lgandi.
Izoh (0)