Qurilish va uy-joy kommunal xo‘jaligi vazirining birinchi o‘rinbosari Sherzod Hidoyatov billing tizimi nima uchun aynan Navoiy viloyatida amalga oshirilayotganiga izoh berdi.
Uning so‘zlariga ko‘ra, mamlakatda boshqa joylarga nisbatan faqat Navoiy viloyatida odamlar to‘lovi tartibli.
O‘z vaqtida to‘lash foizi — 100 foiz bo‘lmasa ham yuqori. Eksperiment sifatida ushbu viloyatni tanlashga sabab, to‘lovlarning yuqori qismi o‘z vaqtida to‘lanmoqda. Eʼtirozlarni o‘rganishda birdaniga katta rezonans bo‘lmasligi uchun ham viloyat tanlangan. Billing tizimi ishlab chiqildi. Elektr tarmoqlari bilan integratsiya ishlarini ham tayyorlab qo‘yganmiz, — deydi Sherzod Hidoyatov.
Ta’kidlanishicha, hozirda tizimni ishga tushirish uchun Energetika vazirligi ish olib bormoqda. Buning uchun energetika to‘g‘risidagi qonunga o‘zgartirish kiritilib, deputatlar tomonidan maʼqullanadi, undan so‘ng Senatga kiritilib, tasdiqlangandan keyin amalga oshiriladi.
Bu juda ham yaxshi samara beradi deb o‘ylayman. Bitta ko‘p qavatli uyda, masalan, 50 ta xonadon bo‘ladigan bo‘lsa, 40 ta xonadon to‘lasa o‘z vaqtida, 10 ta xonadon to‘lamagani uchun qolgan 40 tasiga bu xizmatni ko‘rsatish joyiga qo‘yilmasa, nima uchun xizmatdan foydalana olmasliklari kerak? Hamma o‘z vaqtida to‘lashi kerak deb o‘ylayman. Bugungi kunda bu tajribalar juda yaxshi samara berdi, — deydi vazir o‘rinbosari.
Bundan tashqari, Sherzod Hidoyatov ko‘p qavatli uylarda yashovchi aholiga xizmat ko‘rsatish va chiqindilardan tozalashda to‘lovlar bo‘yicha ko‘plab masalalar yuzaga kelayotganini qayd etgan. Tizim shu kabi masalalarni bartaraf etish uchun ham qilingan, deydi u.
Navoiyda amalga oshirilishi belgilangan tizim ko‘p qavatli turar joy xonadonlarining gaz, elektr va issiqlik taʼminoti, ichimlik va oqova suv hamda chiqindilarni olib chiqish xizmatlari uchun to‘lovlarni yagona tizimda birlashtirishni nazarda tutadi. Sentyabrgacha yagona tizimni ishga tushirish hamda monitoring qilish imkoniyati yaratiladi. Oktyabr oyida tizim tajriba-sinov tarzida Navoiy shahrida joriy etiladi.
Izoh (0)