Rossiya prezidenti Vladimir Putin harbiy xizmatchilar va ularning oilalarini ijtimoiy qo‘llab-quvvatlash bo‘yicha qo‘shimcha chora-tadbirlar to‘g‘risida farmon imzoladi. Unda aytilishicha, Moskva viloyati, Qrim va Sevastopol ma’muriyatlari Ukrainadagi urush faxriylariga yer maydonlarini beg‘araz taqdim etishni ko‘zda tutuvchi qonunchilik aktlarini qabul qilishi kerak. Tegishli hujjat huquqiy axborot saytiga joylandi.
Farmon matniga muvofiq, yer uchastkalariga davlat mukofotlarini olgan harbiy xizmatchilar, shuningdek, urush vaqtida shikastlanib (yaralanib, jarohatlanib yoki kontuziya natijasida) yoki kasallanib halok bo‘lgan harbiylarning qarindoshlari da’vogarlik qilishi mumkin.
Sentabr boshida bunday tashabbus bilan Rossiya Mudofaa vazirligi chiqqan edi.
Ukrainada urush boshlanganidan keyin Rossiya hukumati jangovar harakatlar ishtirokchilari uchun turli imtiyozlarni ko‘zda tutuvchi bir qator qonunlarni qabul qildi. Xususan, martda Putin imzolagan qonunga ko‘ra, Ukrainadagi urush qatnashchilarining barchasi harbiy harakatlar faxriysi maqomiga ega bo‘ldi. Ushbu maqom soliq, transport, yer-mulk, uy-joy bo‘yicha ijtimoiy ko‘mak olish, shuningdek, kommunal to‘lovlar bo‘yicha imtiyozlar huquqini beradi.
Keyinroq urushda qatnashgan harbiy bo‘lmagan shaxslar uchun faxriy maqomi haqida qonun qabul qilindi. Avgust boshida Putin “Rossiya hududiga qurolli hujumni qaytarish bo‘yicha topshiriqlarni bajargan” Federal xavfsizlik xizmati xodimlari uchun jangovar harakatlar faxriysi maqomi haqidagi qonunni imzoladi. Dekabrda Rossiya prezidenti harbiy xizmat mobaynida mehnat shartnomasi muddati tugagan taqdirda, safarbar etilganlarga egallab turgan lavozimlariga qaytish imkonini beruvchi qonunni imzoladi.
Izoh (0)