Yaponiya bosh vaziri Fumio Kisida sentyabr oyida isteʼfoga chiqishini maʼlum qildi. Bu haqda vazirning 14-avgust kuni chiqargan bayonotiga asoslanib. Reuters xabar bergan.
Manbada aytilishicha, Yaponiyada so‘nggi paytlarda Kisida faoliyati bilan bog‘liq siyosiy janjallar kuchayib ketgan. So‘nggi uch yildagi yuqori inflatsiya va iqtisodiy muammolarga qarshi kurashishda mamlakat rahbariyatida iroda yetishmasligi mamlakat aholisi tomonidan ko‘plab namoyishlar tashkil etilishiga olib kelgan.
Bosh vazirni vazifasini tark etishga olib kelgan asosiy masala bu narxlar oshishi bo‘lgan. So‘nggi 6 oyda yashash xarajatlari, oziq-ovqat va kommunal to‘lovlar qiymati noodatiy tarzda oshib ketgan. Hukumatning tezkor iqtisodiy qarorlari narxlar siyosatiga amalda hech qanday taʼsir eta olmagan.
“Siyosat jamoatchilik ishonchisiz ishlamaydi. Menga bo‘lgan ishonch qolmagan ekan davom etishimdan ham maʼno yo‘q. Endilikda men faoliyatimni yangi saylangan LDP (Liberal-demokratik partiya) rahbarini qo‘llab-quvvatlashga qarataman”, degan Fumio Kisida o‘z isteʼfosiga munosabat bildirib.
Bosh vazirning jamoatchilik ishonchini yo‘qotishiga taʼsir etgan boshqa omillar ham mavjud. Kisidaning LDP partiyasi “Birlashuv” xristian cherkovi bilan aloqalarga ega ekanligi aniqlangan. Bundan tashqari saylov kampaniyasida partiya cherkovdan va bir qancha nomaʼlum manbalardan mablag‘lar olgan. Bu esa aholi orasida savollarni keltirib chiqargan.
Kisidaning “vorisi” endilikda dunyodagi to‘rtinchi yirik iqtisodiyotni izga solish uchun qattiq kurashishga to‘g‘ri kelishi mumkin. Chunki narxlar notabiiy tarzda oshmoqda. Hukumat bu sohani nazorat qilish qobiliyatini to‘la yo‘qotgan. Bozorni barqarorlashtirish uchun ajratilayotgan dotatsiyalarni ulkan iqtisodiyot yutib yubormoqda.
Yangi bosh vazir shuningdek, Yaponiyadagi tarqoq va radikal elitani birlashtirishi, iqtisodiy muammolarni bartaraf etishi shart. Bu vazifalar ustiga Xitoyning geosiyosiy tahdidlariga qarshi turish va AQSHdagi hukumat o‘zgarishiga moslashish shartlari ham qo‘shiladi.
Izoh (0)