“Xavf chegarasi”, “Edison”, “Milliarderlar klubi” va boshqa ko‘plab filmlarda ishtirok etgan 64 yoshli aktyor Kevin Speysi Pirs Morganga intervyu berdi. Unda aktyor jinsiy zo‘ravonlik ayblovlaridan oqlangandan so‘ng jiddiy moliyaviy muammolarni boshdan kechirayotganini aytib berdi.
2017-yilda aktyor Entoni Reppga nisbatan zo‘ravonlik va ta’qib qilganlikda ayblandi. Natijada ikki karra “Oskar” sovrindoriga qarshi jinoyat ishi qo‘zg‘atildi. Bir necha sudlardan so‘ng, 2022-yilda Nyu-Yorkdagi hakamlar hay’ati Kevin Speysini aybsiz deb topdi.
Reppning so‘zlariga ko‘ra, 14 yoshida Speysi unga tegajog‘lik qilgan. Ma’lum vaqtdan so‘ng Buyuk Britaniya sudi aktyorga qo‘yilgan to‘qqizta jinsiy zo‘ravonlik ishi bo‘yicha uni aybsiz deb topdi. Aktyor oqlandi, ammo sud jarayoni davomida Kevinning muvaffaqiyatli karyerasi barbod bo‘ldi. Speysining o‘zi barcha ayblovlarni rad etib kelgan.
Intervyu vaqtida aktyor ko‘z yoshlarini tiya olmadi va besh yil davomida juda og‘ir damlarni boshidan kechirganini aytdi. Hozirda u millionlab dollarlik qarzlari tufayli uysiz qolgan.
Suhbat davomida berilgan savol va javoblarga qisqacha to‘xtalib o‘tsak:
Ayblov haqida
“Bunday ishlar hayotimda sodir bo‘lganiga o‘zim ham ishongim kelmayotganini insonlarga bildirmoqchi edim. O‘zimni xuddi meni dushmanlar barcha tomondan siqib, qopqonga tushirgandek his etardim”, — deydi aktyor.
“Agar ular sizga 34 yil avval menga mana shunday ish qilgan edingiz, deb ayblov qo‘yishsa, qanday munosabat bildirar edingiz? Balki o‘sha kuni men mast holda bo‘lgandirman, lekin hech narsani eslay olmayman. Albatta, menga ayblov qo‘yishganda da’vogarni ham ayblash o‘rniga o‘zimga birinchi savol berdim: balki haqiqatda biror sharmandali ish qilgandirman?”
Moliyaviy qiyinchiliklar
“Mening uyim kimoshdi savdosida sotilmoqda, shuning uchun hozirda Baltimorga qaytib, shaxsiy buyumlarimni tovarlar saqlash markaziga ko‘chirishim kerak. Hozirda qayerda yashamoqdasiz, degan savolingizga javobim shu: men uysiz qoldim”.
“Baltimordagi uyimga 2012-yilda ko‘chib o‘tgan edim. Hozir esa hatto oylik kommunal to‘lovlar uchun mablag‘im yetarli emas”, — deya tan oladi Speysi.
Hozir qancha puli borligi haqidagi savolga aktyor “Hech qancha” deb javob berdi.
“Men hali ham qarzga botganman. Millionlab qarzim bor..”
Kevin Speysi o‘zini qanday shaxs sifatida ko‘radi?
Qiyinchiliklar aktyor oilasi va do‘stlari bilan munosabatlarini yaqinlashtirgani haqida ham so‘zlab berdi:
“Men shunday salbiy voqealar ichida haqiqiy do‘stlik va muhabbatni ko‘rdim, oilamga, do‘stlarimga yaqinroq bo‘ldim. O‘zimni anglashga e’tiborimni qaratdim. Hozirda eng yaxshi aktyor, muvaffaqiyatli kishi bo‘lish o‘rniga shunchaki yaxshi inson bo‘lishga harakat qilmoqchiman. O‘tgan yilgi voqealar qadriyatlarimni qayta ko‘rib chiqishimga sababchi bo‘lganidan mamnunman”, — deydi Speysi.
Izoh (0)