“Elektr va gaz isteʼmoli limitdan 20 foizgacha oshib ketsa ham bazaviy tarif saqlanib qoladi” — prezident

Endilikda sanoat korxonalari elektr va gaz isteʼmoli limitdan 20 foizgacha oshib ketsa ham bazaviy narx o‘zgarmaydi. Bu haqda 20-avgust kuni prezident va tadbirkorlar uchrashuvida maʼlum qilindi.

Qayd etilishicha, barcha sanoat korxonalari elektr va gazga o‘rnatilgan limit oshib ketsa, to‘lov ikki karra ko‘p undirilayotganidan norozi bo‘lmoqda.

“Sanoatimizning o‘sishiga taʼsir qiladigan bunday cheklovlar qisqartirilishi belgilandi. Endi elektr va gaz isteʼmoli limitdan 20 foizgacha oshib ketsa ham bazaviy tarif saqlanib qoladi. Agar isteʼmol 20 foizdan o‘tib ketsa, oshgan qismiga to‘lov 20 foiz qimmatlashadi”, degan prezident Shavkat Mirziyoyev.

Muloqotda tadbirkorlik reytingida “yuqori”, “o‘rta” toifadagi korxonalarga elektr uchun oldindan to‘lovni bir oyda ikkiga bo‘lib to‘lashga ruxsat berilishi taʼkidlangan.

Shu bilan birga, majlisda byudjetdan yoki kreditdan qarzi bor tadbirkorlarni hisob raqamiga “inkasso” qo‘yilgani uchun ular elektr, gaz va suvga to‘lov qila olmayotganiga eʼtibor berilgan. Mazkur masala inobatga olinib, endilikda “inkasso” bo‘lganda ham kommunal xizmatlarga to‘lovlar to‘xtatilmasligi maʼlum qilingan.