Isroil hukumati o‘z fuqarolariga terma jamoaning Millatlar Ligasi doirasidagi Fransiya bilan o‘yiniga bormaslikni tavsiya qildi.
Avvalroq Fransiya ichki ishlar vaziri Bruno Retaillot Amsterdamdagi voqealar fonida o‘yinni keyinga qoldirishga qarshi chiqqandi: “Bu zo‘ravonlik va antisemitizmga yon berish bilan barobardir”.
Yevropa Ligasi doirasidagi “Ayaks” —“Makkabi” uchrashuvidan (5:0) so‘ng, Isroil klubi muxlislariga ketma-ket hujumlar uyushtirilgandi.
Hujumlar tufayli Isroil hukumati o‘z fuqarolariga kelgusi haftada sport musobaqalariga bormaslikni maslahat berdi. Ayniqsa, Fransiya—Isroil o‘yiniga tashrif buyurishni xohlovchi muxlislarni ogohlantirdi.
“Milliy xavfsizlik kengashi xorijdagi isroilliklarga ehtiyot choralarini ko‘rishni tavsiya qiladi, ayniqsa kelgusi haftada isroilliklar ishtirok etadigan sport va madaniy tadbirlarga, xususan, Isroil terma jamoasining Parijda bo‘lib o‘tadigan o‘yiniga bormaslikni maslahat beradi”, deyiladi Bosh vazir idorasi xabarida.
“Isroilliklarga hujum qilmoqchi bo‘lgan guruhlar Yevropaning bir qator shaharlarida aniqlandi”, dedi Isroil Milliy xavfsizlik kengashi.
Tashkilot xorijdagi isroilliklarga “ilova orqali taksi buyurtma qilishda Isroil yoki yahudiylik ramzlarini namoyish qilmaslik”ni tavsiya qildi.
Ma’lumot uchun, 14-noyabr kuni Parijdagi “Stad de Frans” stadionida Millatlar ligasining 5-turi doirasidagi Fransiya – Isroil o‘yini bo‘lib o‘tishi rejalashtirilgan. Ushbu o‘yinda xavfsizlikni ta’minlash uchun jami 4000 politsiya xodimlari va jandarmlar safarbar qilinadi.
Izoh (0)